Prome Minister di Aruba Mike Eman tabata panelista riba energia na e prome cumbre ‘Caribbean Energy Security Summit’ organisa door di Vice Presidente Mericano Joe Biden. Lidernan di region Caribense a forma parti di e 36 delegacionnan cu a yega Washington DC pa participa na e evento aki y discuti hunto con yega na un solucion pa transformacion di energia convencional den energia sostenibel. Eman tabatin e honor pa a wordo invita pa participa na e cumbre importante aki. Eman tabata den e segundo panel cu e conocido Jose Maria Figueres, kende ta presidente di Carbon War Room, funda pa Sir Richard Branson y otro empresario.

Prome Minister Eman a cuminsa na splica su filosofia encuanto hotelnan di 5 strea y e  deseo grandi di su gobierno pa e comunidad tambe pronto tin scol, casnan di anciano, bisindario y calidad di bida di 5 strea. “Esaki no ta algo imposibel pa logra.”

Eman: “Si bo mira e dedicacion di nos ciudadanonan pa loke ta nan trabou, pa loke ta cuida nan famia y nan responsabilidadnan, nos por conclui cu nos tin e potencial pa logra esey.”

E audiencia grandi y interesa a haya un splicacion di Prome Minister Eman con Aruba a habri mercado pa inversion priva pa inverti den e cambio di sistemanan di energia convencional cu ta costa hopi placa. Placa cu por wordo uza den educacion y un miho salud publico pa e ciudadanonan. Eman a bisa cu gobierno ta esun cu mester ta cla den loke e kier riba e tereno aki. “Pesey nos a pone nos dilanti e pregunta cardinal ‘Unda nos kier ta na 2020?’ Nos a pone un meta fiho nos dilanti y esey ta cu pa 2020 nos kier ta 100% sostenibel. Una bes e meta tabata cla nos a dicidi tambe pa no pidi ningun pais grandi of organisacion internacional pa ayudo y asina nos a cuminsa traha.” Eman a conta VP Biden y e demas delegacionnan presente cu Aruba ta leu caba pa loke ta e cambionan cu a haci riba tereno di energia sostenibel. E meta cu Aruba a pone su dilanti tambe pa tin un miho calidad di bida pa su ciudadanonan y poniendo esaki cana den compas dentro di e vision mas grandi cu ta e metanan riba tereno di energia sostenibel, a habri porta pa inversionistanan priva, a haci posibel cu cosnan cu gobierno no por a haci, awor si ta posibel.  

“Nos a crea proyectonan PPP (Public Private Partnership) pa tin molinanan di biento grandi na Aruba. Nos a crea proyectonan PPP pa Aruba tin parkenan solar y a caba di habri un di e plantanan di ‘waste to energy’ mas moderno cu tin. Tur esaki pasobra nos a invita sector priva pa ta parti di e oportunidadnan pa inverti loke pa gobierno tin bes ta dificil pa financia.”

Dirigiendo su mes na Vice President Biden di Merca Eman a quote e frase famoso di President Obama ‘Yes we can’, un frase cu e ta kere hopi aden.  “Mi ta kere cu na Aruba y tambe e otro nacionnan Caribense por adopta e energia y optimismo cu bo a demostra awe pa sigui padilanti y nos por haci esey”.   

Den su discurso elecocuente Vice Presidente Biden a menciona Aruba den forma hopi positivo. El a complimenta Aruba cu su maneho. Un maneho cu a resulta den un exito ya cu e isla aki tin un di e penetracionnan mas halto den e region pa loke ta energia renobabel. “Aruba cu a uni su gobierno, utilidadnan y comercio tras di un strategia comun y plan di accion, a logra pa tin bastante energia renobabel pa por satisface un parti di su demanda di coriente.”Biden a bisa cu e crecemento aki ta sigui y pa fin di aña por mira un progreso demostrante na e isla aki. Un tremendo compliment, sigur biniendo di un Vice Presidente Mericano. Aruba por ta orguyoso.

Expresionnan haci den e articulo aki no necesariamente ta refleha opinion di ArenaPoliti.co