Pueblo di Aruba ta paga! 
Boneiro ta den gara di campanja electoral cu lo culmina dia 18 di maart. Mas y mas acusacionnan serio ta wordo lansa na Boneiro tocante e papel dudoso cu gobierno di Mike Eman ta hunga den e campanja electoral, y pa colmo cu placa di pueblo.

Partido UPB cu tabata e partido ruman di AVP pa hopi anja, awor ta sintiendo e traicion grandi di AVP, pasobra AVP a bira lomba pa e partido y ta sostene e candidato Elvis Tjin Asjoe, cu a kibra cu UPB. No ta na Aruba so partido AVP ta conosi pa traidor, na Boneiro tambe nan ta traidor.

Ta conosi cu Otmar Oduber mes a habri e campanja di Elvis Tjin Asjoe na Boneiro. Tambe ta conosi cu e mesun compania di mercadeo di Mike Eman ta yudando Elvis den campanja, y a hiba 40 hende Boneiro pa entrega lista hunto cu Elvis.

Pero locual ta di condena ta e tantisimo coordinadornan cu ta riba payroll di gobierno di AVP, cu no ta trahando na Aruba, pero ta staciona na Boneiro pa algun siman caba, djis pa hiba campanja ayanan pa Elvis Tjin Asjoe. Placa di pueblo di Aruba cu ta wordo malgasta na mas manipulacion. Recientemente minister di finansas a anuncia cu e debe nacional ta 4.000.000.000 florin, y awor berdad tur hende por wak ta unda nos placa ta bai. Placa di pueblo di Aruba den campanja electoral na Boneiro.

E cuestionamento aki no a cuminsa na Aruba mes, sino na Boneiro y riba rednan social por nota e desgusto cu esaki ta tresiendo den Boneiro.

Jeffrey Levenstone di partido UPB a cuestiona esaki den tur prensa na Boneiro, con Elvis ta traha cu e compania di media di Aruba cu a trese 40 hende for di Aruba, paga hotel y cuminda pa nan un siman largo, y Levenstone (UPB) ta alerta e pueblo di Boneiro cu e compania di media aki ta busca pa tuma over departamento di informacion di Boneiro. Y cu esaki Elvis ta hipotecando e pueblo di Boneiro. E articulo completo di sr. Levenstone ta poni akibou.

http://www.boneiruawe.com/mpb-ta-hypotekando-boneiru.html
MPB ta hypotekando Boneiru

Jeffrey Levenstone di UPB ta trese dilanti, ku kampaña polítiko ta un asuntu serio. Ta trata aki di un proseso kaminda partidonan polítiko ta pone nan vishon i nan hendenan ku tin di karga i despues ehekutá e vishon aki dilanti di pueblo pidiendo sosten pa ku e vishon aki. “Durante di entrega di lista djaluna último sinembargo nos a eksperensia un fenómeno ku segun nos, pueblo mester ta na altura di dje. E fenómeno aki ta e loke ku nos ta yama un hipotek ku partido MPB ta poniendo riba lomba di e próksimo generashon Boneriano. 40 persona a bini for di Aruba pa traha pa MPB i pa ta den marcha di entrega di lista. E grupo di hende aki ta pertenesé na un agrupashon ku ta dominá media na Aruba. E grupo aki a keda Boneiru pa mas o ménos un siman, kedando den hotèl i komiendo. E gastunan aki huntu ku tur e gastunan hasi kaba, ta e debe astronómiko ku nos ta yama un hipotek riba lomba di pueblo Boneriano. No brua, esun ku tin di paga e debe aki bek ta abo pueblo. Mi ta splikabo, bo ta bai kantor di number i bo ta kumpra un dòler na bo number preferí. Bo ta hasi esaki ku e speransa ku bo number ta sali i ku lo bo gana 3000 dòler. Ora ku un grupo hinka por ehèmpel 500.000 dòler den kampana, ta pasobra e ta bai saka minimalmente 2 mion dòler for di e isla aki. I abo pueblo tin di bai page. Ningun hende no ta duna ningun partido polítiko sèn por nada. Esaki no ta eksistí na ningun parti di mundu. Si bo kampaña ta wòrdu finansiá, esaki ta basa riba un promesa ku ora bo drenta gobièrnu, lo bo paga bek. Informashon ku nos tin ta ku e grupo poderoso den media Arubano aki, tin e promesa ku si pa un motibu òf otro, e agrupashon MPB logra drenta gobièrnu, nan lo eliminá e departamentu V&P i eliminá tur e servisionan di media i promoshon di kompanianan di gobièrnu i entrega esaki na e grupo ariba menshoná. Ta esaki ta e bèrdat tras di e show di MPB na entrega di lista. Esaki ta pa tur media lokal sa kiko ta spera nan den e eventualidat aki. Pues na tur media ku a ankra nan mes pa un òf otro motibu òf di un forma òf otro na partido MPB, sea alerta, bo ta spièrta. UPB ta sigui traha na un manera stabil pa logra un desaroyo duradero ku mester krea mas seguridat i prosperidat riba nos isla. Nos ta di opinion ku ningun mucha no meresé di nase den pobresa riba nos isla, i nos ta sigui kana e kaminda pa por logra e meta aki. Nos tin mas kos pa informá bo, na su debido tempu nos lo trese esakinan pa bo.” Te asina leu un komunikado emití pa Jeffrey Levenstone di UPB.

Expresionnan haci den e articulo aki no necesariamente ta refleha opinion di ArenaPoliti.co