E ta basta remarkabel pa scucha Ministernan Eman y De Meza gaba cu e rapport preliminario di IMF di 2015, ya cu na 2013 e mesun mandatarionan aki a haci todo por todo pa sconde e rapport di IMF den porta di eleccion.

IMF 2013
Na 2013 net promer cu eleccion IMF a evalua e situacion financiero y ecnomico di nos Pais. E contenido a duna un bista riba e maneho desastroso di Gabinete Eman. Pa e motibo aki e rapport di IMF a wordo scondi y no a mira luz di dia na juni 2013 sino te na augustus 2013, net promer cu eleccion na spetember 2013. For di momento cu e contenido di e rapport a keda conoci, nos por a mira con AVP su Ministernan y Parlamentarionan a cuminsa bombardia e rapport bisando cu ta djies recomendacionnan IMF a bin cune y cu Gabinete Eman no necesariamente mester tuma nan. Banda di esaki e exponentenan di AVP tabata tilda IMF di a dania economianan di Argentina y Venezuela y pesey mester keda lew cu nan recomendacionnan. Asina nan a sconde y bagatalisa e rapport na 2013.

IMF 2015
Awe na 2015 ta un otro ‘ball game.’ Manera cu e rapport preliminario di IMF a keda publica diabierna siman pasa nos por a mira AVP su exponentenan emiti un cantidad di articulo di prensa pa gaba cu e rapport di IMF. Diamars a hasta yama un conferencia di prensa cu transmicion en bibo tabata tin pa Ministernan Eman y De Meza por gaba cu e rapport di IMF. Un cambio radical cu ta refleha e hypocresia di nos gobernantenan di AVP.

Di 67 pa 80 cent
Mas remarcabel ta cu na 2013 ora cu IMF a raporta cu di cada un florin 67 cent mester bay pa paga debe, e exponentenan di AVP a busca tur moda pa tene e rapport scondi pa Pueblo no haya sa e berdad penoso aki. Pero awe cu IMF ta raporta un situacion financiero hopi mas penoso, na unda cu cu di cada florin 80 cent ta bay pa paga debe, Ministernan y Parlamentarionan di AVP ta cana brasa cu e rapport di IMF ta gaba sin fin. Hende sa perde gevoel!

Mas medida
E parti mas tristo ta cu awe e exponentenan di AVP ta gaba cu un rapport di IMF cu ta yena cu medida pa Pueblo. Asina mes cu Gabinete Eman a pasa yen di medida caba riba lomba di Pueblo, IMF den e rapport aki ta indica cu no ta suficiente y cu Gabinete Eman mester bin cu mas medida. Pesey ta increibel pa mira Ministernan Eman y De Meza cana ta gaba rond cu e rapport di IMF, siendo cu hustamente e medidanan aki lo haci Pueblo dolor.

17 februari 2015

Expresionnan haci den e articulo aki no necesariamente ta refleha opinion di ArenaPoliti.co