Atencion mester bay pa e ciudadano profesional cu nos ta forma. 

E transicion di nos economia di uno di industria di petroleo (LAGO) pa turismo den añanan 60 y 80 a haci cu no ta tur hende tabata bay traha den refineria mas. Poco poco mas y mas hende a prepara nan mes pa traha den e industria di servicio di turismo. Awe, contrario na añanan 50 di siglo pasa, mas cu 70% di nos hendenan ta traha directamente of indirectamente den servicionan manera turismo ta ofrece. Cu e cambionan den economia cu ta na caminda esaki ta bay sosode atrobe: mas hende lo mester prepara pa otro tipo di trabou. Di awor caba mester cuminsa prepara pa e industria nobo: e "economia berde". Esaki lo ta un combinacion di servicionan tecnico den energia renovabel, servicionan cu ta haci den su majoria uso di informacion digital via internet y servicionan den comercio internacional. Esaki ta e area di economia nobo cu ta bay bin banda di turismo, cu lo keda pa awor e pilar principal di nos economia. Aunke mester sigui inverti mas y mas den sigui halsa e calidad di e servicio di turismo, pa adkiri mas y mas turista cu ta exigi bon calidad y ta dispuesto pa gasta hopi na Aruba, mester cuminsa awor caba pa prepara pa e diversificacion economico. E plannan anuncia siman pasa pa reforma di nos sistema di belasting lo stimula e diversificacion aki mas y lo accelera e demanda pa hendenan cu tin e conocemento y e habilidadnan pa traha den e industria nobo aki. Esaki ta nifica cu nos scolnan basico y secundario mester cuminsa prepara pa esaki.

RENOBACION DI ENSEÑANSA
Enseñansa ta sirbi nos comunidad den hopi forma. Dos di e metanan di enseñansa ta pa forma ciudadanonan cu conocemento general cu tur hende tin mester y un stimacion profundo pa nan pais. Na mes un momento enseñansa tin cu crea e conocemento, actitud y habilidadnan necesario  ta traha y sigui crece den un of otro area di trabao. Esaki ta nifica entre otro cu enseñansa mester prepara hobennan y grandinan pa trabou cu tin den comunidad. Ora e tipo di trabou den comunidad cambia, enseñansa mester ta cla pa cambia y prepara hende pa trabou den otro area. Esaki a sosode na gran escala ora e refineria a cera na 1985. Hopi hende cu tabata traha den refineria y industrianan rond di e refineria, mester a siña otro ofishi, adkeri otro conocemento y habilidadnan, pa traha den sector di hotel. Awe cu nos sa cu ta bolbe bin otro tipo di economia na nos pais, nos hendenan, hoben y grandi, mester ta prepara pa tuma e trabounan nobo. E no ta intencion pa crea e cuponan di trabaou aki pa hende di afo bin tuma nan. Pa sigura cu nos hobennan lo ta cla pa ocupa e trabounan aki, henter enseñansa, cuminando cu e minister y su departamentonan, mester cuminsa prepara pa e formacion nobo aki. Mester haya un bon bista di e tipo di trabou nobo, mester prepara maestronan pa e areanan aki y mester diseña programanan pa siña e conocemento y habilidadnan nobo. Fraccion di AVP den Parlamento ta aplaudi e desaroyo aki y lo duna su sosten tur caminda cu ta posibel. 

Expresionnan haci den e articulo aki no necesariamente ta refleha opinion di ArenaPoliti.co