MEP TA RABIA CU GOBIERNO NO KIER HISA BBO 

Si ta pa partidonan di oposicion, lo hisa BBO den un tiro sin tene cuenta cu e consecuencianan. Esey ta loke CFT ta propone tambe. Den nan forma di pensa, CFT tampoco ta tene cuenta cu e consecuencianan di finansa publico pa resto di pais, pa economia y calidad di bida. Ta pesey MEP ta sostene CFT y su medidanan y nan ta rabia cu AVP cu no kier aumenta e BBO. Enbez di e tipo di medidanan cu pueblo a custumbra di MEP, gobierno di AVP a y ta sigui scohe pa reformanan structural. Pasobra esakinan ta duna resultado permanente. Ademas si haci e reforma gradualmente manera ta haci awor, e ta tene cuenta cu pueblo trahador, cu sector priva, cu crecemento economico y cu calidad di bida di nos hendenan.

REFORMA STRUCTURAL
Enbez di medida, gobierno di AVP a scohe pa baha gasto di gobierno door di reforma e sistema di pensioen di trahadornan di gobierno y maestronan di scol. Y a haci'e den forma gradual door di cual e peso ta bira menos. Ademas a trece un solucion pa hopia aña: tur pensionado por ta trankilo atrobe. E peliger cu nan lo bay a perde tur nan pensioen manera tabata e caso na 2009, no tey mas. Nan pensioen ta sigura pa hopi aña, awor cu e fondo a bolbe bek na 100% cobertura!

Enbez di corta den e pakete di cuido medico manera MEP tabata kier, cu lo a afecta specialmente esnan cu un entrada abou pasobra nan no tin pa cubri nan propio gastonan di docter y remedi, gobierno di AVP a scohe pa mantene e pakete di cuido, reforma e servicio di AZV, controla su gastonan den forma structural y introduci e "health tax" cu ta yuda enormemente pa cubri costonan medico. E "health tax" no a subi e prima di AZV di e trahador, ni di e doño di trabou. E forma indirecto di crea entrada aki ta efectivo, pasobra ta tur hende na Aruba ta contribui. No e trahado y su doño di trabou so. Tambe e un miyon turista cu ta bini aki.

Embez di bira lomba pa pensionadonan y trahadornan manera MEP a haci entre 2001 y 2009, gobierno di AVP a scohe pa mehora nan forsa di compra cu a keda stanca pa 7 aña bou gobierno di MEP. E desicion pa mehora forsa di compra di trahadornan di gobierno, trahadornan den sector priva y pensionadonan mey mey di un crisis mundial, a yuda den forma significante pa saca Aruba for di e abismo cu MEP a laga Aruba aden. E forma aki di pone atencion na tur y no na un "grupito" so, ta e forma di busca solucion structural y no tuma medida.

Enbez di introduci mas belasting djis pa haya mas entrada y sin duna pueblo nada bek, gobierno di AVP a scohe pa reforma den forma structural henter e sistema di belasting. Door di esey e sistema ta bira mas facil pa administra, mas transparente, mas facil pa cumpli cun'e y mes ora ta alivia esnan cu menos entrada. Atrobe otro ehempel di busca solucion structural, enbez di medida djis pa haya mas placa.

Pueblo kier wak nos pais bay dilanti, pasobra pueblo sa cu ora cos bay bon pa Aruba e ta bay bon pa nos tur. Pueblo no kier solucionnan barata cu ta bin bek manera un "boomerang" pa dal bo. Pueblo kier solucionnan cu ta conta pa un y tur. No djis pa "friends and family".

Expresionnan haci den e articulo aki no necesariamente ta refleha opinion di ArenaPoliti.co