Durante presupuesto 2016 atrobe Minister Eman kier a purba hustifica e MEGADEBE cu ela hinca nos Pais aden bisando cu ela inverti hopi fondo publico den nos economia. Segun e mandatario ela haya nos Pais na 2009 den un crisis financiero cu un infrastructura den decadencia, schoolnan den ruina y un explocion di problema social. Pesey segun Minister Eman ela scohe pa inverti grandemente den nos Pais. Pero e cifranan di Banco Central ta mustra cu Gabinete Eman no a inverti mas cu Gabinete Oduber y sigur no a inverti den un manera cu por hustifica e MEGADEBE di nos Pais.

A redobla debe sin mucho invercion
Den solamente 4 aña di gobernacion Minister Eman a redobla e debe acomula pa tur gobierno di nos Pais den 23 aña di tempo. Un record, ya cu a subi e debe di nos Pais awor caba na mas cu 4 biyon y na momento cu e proyectonan Private Public Partnership (PPP) keda cla, nos Pueblo lo tin un debe cu ta core den 6 biyon riba su cabes. Remarcabel ta cu cifra di Banco Central ta demostra cu mayoria di e fondonan no a bay pa invercion den Pueblo. Ta un parti masha chikito mes a bay pa inversion.

No a inverti mas cu Gabinete Oduber
For di e cifranan di Banco Central ta bira bisto cu e invercion cu Gabinete Eman a haci no ta surpasa e invercionnan haci pa Gabinete Oduber y a keda na un average di 67, 5 miyon pa aña den e ultimo 5 aña cu ta equivalente na 1.5% di nos GDP durante e añanan. Pesey ora cu Minister Eman bisa cu ela inverti grandemente y mas hopi cu tempo di MEP, e mandatario ta simplemente gaña. E diferencia si ta cu Minister Eman a crea un MEGADEBE pa nos Pais, algo cu Gabinete Oduber tabata tin e sano juicio pa no a malogra nos Pais cune.

No por hustifica e MEGADEBE
E ta bisto cu Minister Eman no por hustifica e MEGADEBE bisando cu e placa a bay den invercion pa Pueblo ya cu cifra di Banco Central y rapport di CAFT tambe, ta desbarata e palabra di Eman. Locual Minister Eman no por bisa ta cu e placa aki a bay na consumo pa practica clientelismo na unda a usa fondo publico pa cumpra voto pa yega y keda na poder. A haci debe grandi pa duna hende cos, duna trabou na unda no tin vacatura, paga contract cu salario halto pa funcion cu no merece un pago asina grandi, huur edificio di famia y sponser di partido, paga suma astronomico na fee di abogado amigo di partido, paga fee halto pa huur in conseho di consultant pa asina pone e experticio di e ambtenaar un banda, biaha den grupo grandi rond di mundo, sponser team di futbol cu ta perde, paga huur y yen di otro gasto pa Rietveld y TNO, traha yen departamento nobo pa gobierno pa asina nombra campañador como coordinador, paga compania di marketing sumanan cuantioso pa haci propaganda pa manipula e Pueblo su mente cu informacion robes y pa cuestiona y lastra opocicion. Ta pa esaki Minister Eman a crea un MEGADEBE na nos Pais. Pa drecha e economia di un grupo selecta di amigo, famia, sponser y hasta lovers, lagando e Pueblo bay atras sin invercion pa crece nan cartera y e economia di nos Pais. Ta pesey Minister Eman ta recuri na e mentira cu ela crea un MEGADEBE pa por inverti den Pueblo, pasobra e no tin e curashi pa bisa e berdad di tur e abuso cu ela haci cu e fondo publico di nos Pais.

4 februari 2016

Expresionnan haci den e articulo aki no necesariamente ta refleha opinion di ArenaPoliti.co