Dangui Oduber (MEP): Cu un maneho asina controversial minister Benny Sevinger mester entrega su retiro!
Minister Benny Sevinger sigur ta un di e ministernan mas cuestionabel di e gabinete Mike Eman 2 aki. No solamente e ta fiesta cu patrimonio di pueblo na su antoho pero e no tin maneho integral di infrastrcutura. Mas bien su maneho ta basa riba yuda amigonan, yuda sponsornan y te hasta yuda coleganan di partido. E ultimo simanan aki tin varios caso cu a presenta cu ta trece duda serio den e integridad di benny Sevinger. Tin e caso di Roberto Rincon cu ta un di e sponsornan mas grandi di partido AVP y cu ta encarcela actualmente na Houston Texas pa soborna politiconan. Ta fresco den nos memoria con Benny Sevinger, segun su version, no tawata conoce Roberto Rincon a duna Rincon un tereno di mas cu 3000 meter cuadra den apenas 5 dia. Segun Benny Sevinger ta por medio di google e la haya sa kende ta Rincon. Con stranjo esaki por zona pasobra e mesun Rincon aki ta viaha y ta wine and dine cu coleganan Paul Croes y De Meza y e propio De Meza a confirma cu Rincon tawata intermedia pa gobierno di Aruba na Houston. Nos tin cu bisa Benny Sevinger e ora, a otro perro con ese hueso!
No solamente tin e caso di Rincon pero den e sentencianan contra Benny Sevinger den 2 caso di ‘’bestemmingswijziging’’ di terenonan caminda Sevinger contra decision di huez a cambia e bestemming. Huez tawata hopi cla den su sentencia y a bisa cu Sevinger ta zaag na e pianan di nos estado di derecho.
Tin e sentencia contra e minister aki den e caso di e boutique hotel Ocean-Z y tambe den e caso di un ciudadano cu tambe a lanta un caso contra e minister.
Banda di esaki tin e caso di e proyecto di Dump di e compania Bouldin & Lawson. Huez a dicta den su sentencia cu Benny Sevinger y su gobierno deliberadamente y intencionalemnete a boicotea e proyecto aki. E resultado awe ta cu e proyecto ta para pa mas cu 6 anja, no tin solucion ainda pa e problematica di medio ambiente y mas peor aun Benny Sevinger ta culpabel na ‘’kapitaalvernietiging’’ e mester wordo tene perosnalmente responsabel pa e 28 miyon florin di placa di pueblo cu a wordo inverti den e proyecto aki y pa su capricho y negligencia nunca a funciona.
Por ultimo tin e caso caminda colega minister Otmar Oduber ta pidi un tereno pa bira agricultor. Nada contra esaki pero loke nos ta cuestiona si ta e procedura cu esaki a encamina. Contra tur regla di bin gobernacion minister Oduber ta haci un peticion na su colega pa un tereno huurgrond cu den apenas 1 dia ta wordo gefixed. No solamente colega minister ta wordo yuda pero diferente miembronan di fraccion y miembronan di gabiente Mike Eman 2 a haya cantidad di tereno na Malmok y Palm Beach. Asina aki nan kiermen nan ta traha pa pueblo. Loke nan ta haci ta traha pa nan mes y laga pueblo para wak y bati man.
Un minister manera Sevinger na otro pais masha dia e lo mester a bai cas. Ta na Aruba so tanto cos por pasa cu un minister y e ta keda sinta manera nada no a pasa. Den un pais tin ley, tin regla y tin maneho y na momento cu un minister ta viola tur esakinan ta pasobra sea e ta incapaz of e no tin cuero di cara!
Expresionnan haci den e articulo aki no necesariamente ta refleha opinion di ArenaPoliti.co