MEP: Gerick Croes a perde su caso contra MEP
Segun hues MEP a actua corectamente
Hues diabierna ultimo a duna veredicto den e caso den cual Gerick Croes a demanda partido MEP.
Hues a rechasa e demanda di Gerick, y pues MEP no mester rectifica nada, ni paga danjo di 52 mil florin, manera cu Gerick a demanda. Tambe hues a bisa cu e forma con MEP a atende cu e asunto tabata bon, y cu ni presidente di partido dr. Gerrit Croes, ni lider di partido sra. Evelyn Wever-Croes, a comete ningun acto incorecto cu Gerick. Den discussion den e caso aki tabata si MEP of su integrantenan por a susha nomber di Gerick of por a atacha su reputacion of carera, y den esaki hues a conclui cu no tabata e caso.
Di parti di partido MEP a emeti e sigiente declaracion:
Partido MEP a pasa den un proceso dificil ultimo simannan, despues di a bira victima di ladronicia di casi 15 mil florin. Mientras tanto e placa a wordo recupera, y partido a tuma tur medida di precaucion pa algo asina no socede nunca mas.
Dirigentenan di partido a hasi tur lo posibel pa atende e asunto aki internamente y liher, sin duna publicidad. Lamentablemente e noticia a bai den publicidad.
Nos ta contento cu awor e proceso aki a finalisa, y pa partido MEP nos ta sera e capitulo awor. E tabata sigur un proceso doloroso y penoso pa tur envolvi, especialmente ora ta trata di un persona cu nos a deposita tur nos confiansa den dje. Pero mes momento e tabata un proceso necesario, pasobra integridad pa partido MEP no ta un palabra so, sino un mision, y bo ta prueba esey cu hechos cuminsando den bo propio partido. Awor cu esaki ta tras di lomba, nos lo sigi enfoca tur nos energia atrobe riba nos lucha contra e gobernacion mas malo cu nos pais a conose, y pa hiba e pais aki padilanti.
Expresionnan haci den e articulo aki no necesariamente ta refleha opinion di ArenaPoliti.co