Hunto cu UNOCA, ATA y DOW a haci bishita na Plasa Betico Croes. 

ORANJESTAD (AAN) – Minister Otmar Oduber ta den un gira di bishita na diferente proyecto cu ta cay bou di su ministerionan. Un di nan cu el a bishita ta Plaza Libertador Betico Croes, cual proyecto su renobacion a costa rond di 1.4 miyon florin. E proyecto aki a wordo realisa cu ayudo di fondo di TPEF, ATA y UNOCA. Den un declaracion duna na e sitio, e mandatario a expresa su satisfaccion cu e proyecto aki di Plaza Libertador Betico Croes den cual trabounan a dicidi pa haci miho uzo di tur e espacionan cu tin disponibel. E plaza aki tabatin mester di atencion, ya cu ta trinta aña pasa el a wordo construi y nunca mas despues a haci algo riba dje.  Mirando e cambionan grandi cu a wordo haci den e plan por bisa cu e ta un plaza completamente nobo. A haci hopi uzo di espacio perdi, principalmente e stage bou di e escenario unda cu a awor a crea un area pa gruponan di baile, etc, lo por haci uzo di e espacio aki pa ensayo,a drecha e bañonan tambe pa nan por haci uzo di dje. Ta trata di areanan cu no tabata wordo uza. Ora di evento ta pone tentnan pafo y ta uza esakinan enbes di e area bou di e escenario. Awor tin 4 baño abou pero tambe pafo pa e publico por uza. A haci e area accesibel pa personanan cu ta haci uzo di rolstoel, a pone bankinan rond. Tambe a haci trabou pa protege e busto di Betico Croes cu tin riba e plaza. “Realmente mi ta hopi contento y e inversionnan aki ta demostra cu nos ta sigui mantene e plaza den futuro. Nos ta papia cu e fundacion nobo cu ta atende cu Musiconan na Aruba y a priminti nan cu nos lo subsidia dos persona pa traha pa e fundacion. Y tambe cu nan lo por haci uzo di e facilidadnan aki riba, unda tin oficina, y espacio pa reuni, espacio pa organisa nan actividadnan. Nan a keda hopi contento cu esaki,” e mandatario a bisa. Minister Oduber a expresa cu e ta combersa tambe cu UNOCA pa mira si nan por tuma maneho di Plaza Libertador Betico Croes, apesar cu e no ta un tarea primordial di nan. Pero ta pensa riba e hecho  cu e tin un aspecto cultural asina grandi y mester percura cu tin instancianan cu por carga responsabilidad den mantencion di e facilidadnan y nan maneho. Gobierno a inverti hopi pa haci e sitio aki uno acustico pa cual mester por maneh’e y dirigie cu e por funciona pa su metanan. Y esaki no ta tarea di Gobierno.Probablemente, pa fin di augustus e proyecto ta keda cla y entrega. Minister ta spera cu den luna di augustus mes tambe lo ta cla Plasa Padu, banda di edificio Cocoloshi. E ora cu lo tin  Plaza Turismo, Plaza Padu y Plaza Betico cu ta espacio cu personanan por uza hopi bon den futuro.  Tin un proyecto di ATA  cu ta andando caba, unda cu ta uniforma tur loke ta indicacion pa turistanan. Tur caminda tin indicacionnan ta wordo poni pa luganan di atraccion, sitionan  historico, y cu ta inclui  parti di splicacion na cada Monumento y Plazanan. Minister Oduber a sigura cu tur plaza lo bay haya nan atencion y e proyecto di indicacion den ciudad ta encera un suma di 700 mil florin mientras cu a cuminsa cu e parti aki pa San Nicolas tambe cu lo bay costa rond di 200 mil florin. Pues en total e inversicion di borchinan pa guia turista ta yega na alrededor di un miyon florin. En total ta papia tambe di casi 30 busto of monumento unda lo pone un plakkaat cu e informacion detaya pa e turistanan keda bon informa riba nos historia. Minister Oduber tabata compaña pa representante di UNOCA, cual instancia a coopera cu casi mey miyon pa drecha e plaza.  

Expresionnan haci den e articulo aki no necesariamente ta refleha opinion di ArenaPoliti.co