ORANJESTAD - E siman aki e minister di turismo di Aruba sr Otmar Oduber a expresa publicamente cu e no ta di acuerdo cu e fiesta di tereno di Bemny Sievinger. E minister di turismo a indica cu na su opinion berdad mester di mas camber pa e turista cu mas entrada, pero cu su colega minister di infrastructura di otro banda ta otorga tereno pa otro tipo di hotelnan y pa all-inclusive. Hasta ta otorga tereno den areanan "green", destruyendo e poco naturalesa cu ta kedando riba nos isla. Minister Benny Sievinger ta hasiendo di Aruba "One Sad Concrete Island".

"Akinan obviamente tin un falta grandi di sincronisacion di maneho y esun cu mester percura pa e sincronisacion, e prome minister di nos pais, ta scondi den su cocolishi.
AVP ta e partido cu prome cu eleccion na 2009 a fulmina contra mas camber di hotel y hasta a cataloga e ex minister di infrastructura di MEP como "Mrs Real Estate". Esaki especialmente durante construccion di Ritz-Carlton. Pero awor den gobierno a bin ta hasiendo exactamente locual nan a cuestiona durante cu nan tabata den oposicion.

Partido MEP ta e unico partido cu realmente tabata tin un vision riba tereno di turismo. Tabata tin e plan di Sasaki y tabata tin e rapport di Sam Cole na 2008 tocante sostenibilidad di turismo na Aruba. Den e estudio aki e enfasis di Sam Cole tabata pa contesta e preguntanan: "How far, and how fast? Population, culture and carrying capacity in Aruba".
Cu e rapport aki gobierno di MEP bou guia di sr Edison Briesen y sr Nelson Oduber a duna contenido na e desaroyo real di turismo na Aruba. Un desaroyo sostenibel cu lo a duna hopi beneficio riba termino corto y largo.
E tempo ey no tabata tin tanto problema manera awor cu e maneho "ad hoc" di e gobierno di AVP. Den gobierno di MEP tabata tin e consensus y compromiso pa duna turismo e atencion serio y responsabel cu e merese. Y e tempo di gobierno di MEP tabata trata e gremio AHATA cu respet. Contrario na awor unda cu e minister di turismo ta wordo boycotia pa su coleganan y riba dje ta den un guera feros cu gremio di turismo, AHATA.
Aruba merese mihor, Aruba merese un gobierno cu tin un vision real y serio riba e tereno di turismo cu ta nos unico pilar economico y cu ta pone pan riba mesa di miles di famia. Nos pueblo no merese cu ministernan Benny Sievinger y Mike Eman ta "tag team" pa masacra nos turismo. E problemanan di nos pais ta serio, pero e solucionnan no ta dificil si bo tin Vision, Determinacion y Curashi" Evelyn Wever-Croes, lider di MEP a duna di conose.

Expresionnan haci den e articulo aki no necesariamente ta refleha opinion di ArenaPoliti.co