Andin Bikker (PDR): Mester modernisa e ley di Raad van Advies
E ley actual ta anticua y ta stroba minoría di pidi conseho.
Raad van Advies a nenga di duna un conseho adicional riba e ley di “all-inclusive” basa riba un argumento formal (dus no riba contenido) cu e peticion proponi pa lider di PDR, Andin Bikker, no a bin di un mayoria di Parlamento, pues e ora no por trate. Esey ta pone cu semper fraccion den minoria mester di cooperacion di e mayoria cu ta sostene Gobierno pa por haya un conseho adicional di Raad van Advies, cual cooperacion claro nunca lo wordo duna paso e fraccion mayoritario ta sostene Gobierno ciegamente! Pa colmo e propio Raad van Advies ta boga den su jaarverslag 2015 pa un Corte Constitucional paso no tin suficiente garantia (“waarborg”) pa e calidad di leynan na Aruba. Awo cu Raad van Advies a haya un oportunidad pa duna conseho a tuma un posishon formal y no ta bay in riba e petishon su contenido, cual ta di lamenta. Mirando esey PDR ta di opinion cu mester modernisa e art. 17 di e Ordenansa di Raad van Advies y pone na un nivel mas practico y realistico, por ehempel comparabel na e exigencia actual pa por introduci un mocion: si minimo tres miembro di Parlamento pidi pa advies, no mester cooperacion di un mayoría. By the way, dor cu Raad van Advies no a bay in riba e contenido di e peticion pa advies adcional, Gobierno no por saca conclushon cu su ley lo ta bon, paso e conseho negativo di Raad van Advies ta keda valido! Pa colmo PDR a mustra riba mas fayo den e ley cu Raad van Advies mes a seňala, pues e ta keda un ley mal traha cu entre otro 1.
ta contra nos Constitucion y Tratadonan internacional, 2. lo trece cune cu pais Aruba lo wordo exponi na claimnan multi-miyonario y 3. cu Gobierno lo mester bay duna centenares di permiso nobo pa bar y bende cuminda dor cu tur hende cu ta huur camber, condominio, cas of appartement mester bay pidi un “logementsvergunning” (cual permiso ta duna derecho pa tin un bar y bende cuminda). Awo ta keda e pregunta, si e ley haya un mayoria den Parlamento, si articulo 21 di Reglement voor de Gouverneur van Aruba lo wordo aplica paso, den ausencia di un Corte Constitucional (cu e propio Raad van Advies a boga pe), no ta resta mucho otro waarborg pa cu e ”calidad” di e ley den e setting actual, caminda cu Gobierno ta preshona pa e ley wordo adopta sin cambionan instrumental.
Expresionnan haci den e articulo aki no necesariamente ta refleha opinion di ArenaPoliti.co