Minister Otmar Oduber: Aruba ta cla pa e gran siman di Aruba Summer Music Festival
Minister Otmar Oduber ta anuncia cu tur cos ta cla pa e gran siman di Aruba Summer Music Festival durante cual artistanan local y internacional lo deleita local y turista cu nan excelente presentacionnan.
Mester bisa cu e promocion cu e festival aki a ricibi na e diferente paisnan di America Latina y Caribe ya caba ta dunando su frutonan.
Vuelonan for di Corsow ta completamente yen ya caba for di diaranson, esunnan di Colombia for di diahuebs, mientras cu Venezuela ta reaccionando na un forma hopi grandi tambe. Aki no por laga afo cu e reaccion na Panama, Argentina y Chile tabata hopi positivo tambe.
E mandatario a indica cu e tipo di eventonan asina ta duna un empuhe na nos turismo den e lunanan cu normalmente ta conoci pa ta abou den turismo y den e caso aki ta atrae turistanan Latino Americano. Fuera di esey ta duna reconocemento na nos propio artistanan, mientras cu e produccion di e evento completo ta den man di companianan local.
Expectativanan ta grandi y nos isla ta cla pa ricibi artistanan y bishitantenan pa un magno evento manera ta e Aruba Summer Music Festival.
Nicky Jam lo ta yegando Aruba dia 24 di juni. Carlos Vives, Elvis Crespo y Jerry Rivera lo yega nos isla dia 25 di juni, mientras cu Pitbull ta yega 26 di juni.
E prome anochi di concierto lo cuminsa diahuebs 25 na Aruba Entertainment Center pa 8or di anochi cu nos propio bandanan D’Licious, N-Fuzion, Tsunami, Robert y su Solo Banda Show y Le Groove. Entrada ta completamente gratis y Minister Otmar Oduber ta invita tur hende pa sostene nos talentonan local.
Diabierna 26 di juni na e Harbor Square Arena tur presente lo por disfruta for di 8or di anochi di e presentacionnan di Jerry Rivera, Elvis Crespo y Carlos Vives.
E anochi final lo ta diasabra 27 di juni tambe pa 8or unda un y tur lo disfruta di e gran artistanan cu ta Pitbull, Nicky Jam y nos propio NutzBeatz.
Minister Otmar Oduber kier a probecha e ocasion aki pa gradici tur artista cu ta biniendo Aruba pa e gran promocion cu nan ta haciendo pa nos isla, promocion cu ya caba a wordo realiza riba Twitter y diaranson lo bay riba Facebook di cada un di nan.
“Aruba, ban mustra cu nos ta cla pa ricibi nos bishitantenan y demostra na nan dicon nos ta sobresali den servicio haciendo di nos isla uno unico den nos region”, Minister Otmar Oduber a duna di conoce.
Expresionnan haci den e articulo aki no necesariamente ta refleha opinion di ArenaPoliti.co