Minister Otmar Oduber: “Laga e esfuerzo di cada un di e pioneronan ta ehempel y inspiracion pa nos generacion sigui haci di nos turismo esun number uno den Caribe y na mundo!”
Minister Otmar Oduber durante inauguracion di Monumento Ike Cohen
Diahuebs atardi a celebra e contribucion di e pioneronan den nos turismo cu nan nomber graba na Monumento Ike Cohen cu a wordo inaugura na Plaza Turismo.
Minister Otmar Oduber como titular di Turismo tabatin e honor di dirigi su mes na e invitadonan presente, entre cual algun di nos pioneronan den turismo. El a indica cu 60 aña pasa Minister Juancho Irausquin hunto cu e Comisionado di Turismo, Oscar Henriquez a bin cu e idea di un hotel luhoso. Cu nan vision, e espiritu pionero y e yudanza di otronan, esaki a bira realidad na 1959 cu apertura di Aruba Caribbean Hotel. Esaki tabata e comienzo di e era di progreso y desaroyo di Aruba cu a planta e simia pa un desaroyo exepcional di nos industria turistico. E la habri caminda pa hopi mas innovadornan, pioneronan y entrepreneurnan den tur area di hospitalidad.
E monumento Ike Cohen diseña pa Raffy Kock den colaboracion cu PMEC a wordo realiza na honor di e pioneronan di nos industria. “Pami Ike Cohen ta representa un empresario trahador cu un espiritu pionero y un vision claro; un homber cu un diversidad di interesnan, cu un pasion pa turismo y mas importante ainda, un compromiso pa logra excelencia”, Minister Oduber a indica.
E nombernan graba den e monumento ta esunnan di individuonan cu a contribui grandemente na e desaroyo dinamico den diferente aspecto di hospitalidad. Algun a sobresali pa nan vision y liderazgo y nan habilidad pa persuadi, manera Juancho Irausquin y oscar Henriquez. Otronan tabata pioneronan y a tuma riesgonan, manera Wichi de Palm, Ramon Richardson, Harold Malmberg, Raymond Maduro, Eduardo de Veer y Ewald Biemans. Eline Bartels-Daal tabata un innovador di mercadeo. Lloyd Baptist y Jesus Kock cu a habri e porta di entretenimento.Tabatin entrepreneurnan creativo manera Louis Pavlis, Charlie Brouns Senior y Charlie Brouns Junior, Herman Ponson, Chaubin y Maurice Neme y Eduardo Ellis. E pasion y empuhe di Simon Oduber Jr. tabata e fundeshi pa industria di MICE na Aruba. “Na tur e pioneronan cu nos ta honrando awe tardi, hopi danki pa e excelencia cu boso a brinda Aruba”, Minister Oduber a bisa.
El a agrega cu tur nos pioneronan cu ta wordo homenahea tin algo en comun, nan vision pa hiba nos isla dilanti. Hendenan balente cu a desplega gran curashi. Hendenan cu a pone accion na palabra y a tuma riesgo pa realiza nan soño.
“Lo cual mi ta reconoce ta cu e vision, soño, liderazgo, iniciativa, creatividad y perseverancia, di algun, por impulsa y inspira henter un pueblo. Ta asina importante, pa nos recorda nos historia y educa nos generacionnan nobo cu nos ta cosecha lo cual nos ta sembra. Y bosonan a sembra simianan di exito. Pesey mi persona a haya asina importante pa graba e nombernan di e personanan cu durante 60 aña a contribui cu e desaroyo di e principal industria di awendia riba nos isla. E futuro di nos pais ta demanda di nos tur e mesun caracteristicanan cu e precursornan di nos turismo a desplega den e infancia di nos industria.
Masha danki pa a pone e fundeshi fuerte riba cual nos a construi nos industria aki asina exitoso. Alavez, mi no por keda sin gradici tur esnan cu dia aden dia afo ta labora cu hopi positivismo den e industria exitante aki. Boso tur ta fuente di inspiracion pami y e futuro di nos isla ta den nos man. Manera Ike Cohen, sigui inova, sigui lidera cu curashi y curazon y tambe sigui persisti pa haci un bon trabou.
Laga e esfuerzo di cada un di e pioneronan ta ehempel y inspiracion pa nos generacion sigui haci di nos turismo esun number uno den Caribe y dicon no...na MUNDO!”
Expresionnan haci den e articulo aki no necesariamente ta refleha opinion di ArenaPoliti.co