Benny Sevinger: Mayoria proyectonan di PPP awor ta esnan cu tin casi 30 aña den preparacion
![Sevinger01](/images/400x210/Sevinger01.jpg)
Minister Sevinger den su introduccion a splica prensa, debi na preguntanan cu el a haya den Parlamento, pakico ta scoge pa realisa cierto proyectonan via di e formula di PPP. E motibo principal ta cu momento cu e prome Gabinete Mike Eman a cuminsa traha, a constata cu tabatin desaroyo den sector turismo, pero e hospital di Aruba, viviendanan, casnan di anciano y principalmente infrastructura a keda hopi atrasa. "Mirando esaki, nos a dicidi di traha un Masterplan unda a dicidi cu durante 8 aña ta inverti den producto Aruba. A traha e Masterplan y a traha un plan con lo bay financia e proyectonan." El a splica cu den e parti di financiamento a yega na e fondonan di FDA (Fondo Desaroyo Arubano), fondonan di TPF (Tourism Product Fund), di Presupuesto di Pais Aruba y a haci un analisis di fondonan cu por bini di sector priva. Mirando cu tin proyectonan asina grandi cu no por wordo poni den Presupuesto di Pais Aruba y cu tin disponibilidad di sector priva pa inverti den sociedad cu Gobierno, a haci uzo di e formula di PPP.
Pa duna un splicacion di e e situacion, Minister Sevinger a duna e ehempel di Green Corridor cu ta un proyecto di mas di 100 miyon florin, cu tin ta papia di dje pa decadanan largo caba. Si kier realisa e proyecto aki, mester pone e suma completo di 100 miyon florin riba presupuesto di e aña den cual e ta bay wordo realisa. "Y esaki nunca por wordo realisa ya cu den Conseho di Minister ta pone prioridadnan pa enseñansa, husticia, asuntonan social, infrastructura, etc. Ora di reparti e placa, e parti i Infrastructura nunca por yega 100 miyon florin den un aña. ... Mester busca otro forma di financia e proyectonan aki."
E formula di PPP, e mandatario a sigura, no ta nada otro cu manera un persona ta cera un hipoteca pa construi su cas y paga esaki bek den tanto aña. A dicidi di haci un analisis pa mira cual ta e proyectonan cu por wordo uza via di e formula di PPP, unda cu sector priva ta inverti placa y cu conocemento. A scoge pa Green Corridor cu ta un caminda di 4 via pa San Nicolas cu tin mas di 30 aña den preparacion. Pero expertonan a bisa cu e vierbaans no por yega te San Nicolas, ya cu ni den 100 aña ta logra cumpra tur e casnan cu tin e ruta, pa cual a conseha pa haci e caminda di 4 via for di aeropuerto te cu Pos Chiquito. Y for di eynan bay direccion di San Nicolas, amplia a "adernan" (caminda) existente haciendo nan mas viabel.
E di dos proyecto cu a scoge pa bay via di e sistema di PPP tabata Watty Vos Blvd, cu ta tuma e trafico for di aeropuerto, pasa banda di Codemsa, Meiveld, Seroe Patrishi, Ponton, sali na Bushiri y bay direccion di hotelnan. Otro proyecto cu tin mas di 30 aña trahando riba dje, cumprando tereno y casnan pa por haci’e un realidad.
Dos otro proyecto mas cu a wordo scogi pa bay via di e sistema di PPP ta renobacion y ampliacion di dr. Horacio Oduber Hospital y e proyecto di Waste to Energy.
Expresionnan haci den e articulo aki no necesariamente ta refleha opinion di ArenaPoliti.co