Pueblo di Aruba, tur hende aki na Aruba ta na altura di e sucedidonan lamentabel cu ta cay bao di criminalidad. Aruba su minister di husticia, for di un principio a duna muestra di ta incapacita pa maneha e cartera di husticia. Por corda ainda con sr. Jossy Mansur ta cuestiona e minister aki su nombracion. Semper e minister su defensa debil tabata cu criminalidad na Aruba mester wordo mira como percepcion. 
Awendia cu e minister no por sconde mas e nivel alarmante di criminalidad na Aruba, un minister cu ta gosa di “brevet van onvermogen”, su persona ta bin cu otro excusanan fofo. Segun e minister, criminalidad a subi mundialmente. Poblacion di Aruba tambe a subi substancialmente. Na mas cu un ocasion, e minister ta uza tambe cu ta e bishitantenan ta causante di e crecemento di criminalidad na Aruba. Conclusion segun e minister: pakico criminalidad tambe no por subi? Como e cherry riba e bolo di excusa y muestra di incapacidad ministerial completo di husticia, awor e minister ta bin cu: Pa por combati crimen mester di placa! Esaki ta mescos cu e minister ta bisa cu un auto mester di wielnan rondo pa e core y no wielnan cuadra (vierkant). E declaracion aki ta absurdo y ta indica con incapacita e minister ta, pa cu e cartera di husticia. Dicon? Door cu ta su persona como minister tin e maneho! Ta su maneho mester determina, a base di un plan di gobernacion relaciona cu hustica, cuanto placa su ministerio tin mester di dje pa mantene criminalidad abao. No solamente placa, pero tambe maneho di regulacionnan. Den forma di leynan nobo y ahustacion di leynan existente. Pues un combinacion di maneho y no core tras di e echonan y planifica pa loco. E suma total cu ta necesario, mester wordo presenta den e presupuesto di gobierno tambe. Hunto cu e splicacion detaya di e inversionnan, accionnan di supervision y prevencion, cursonan y tur otro detaye. E minister no por esaki? Si criminalidad crece, e ta destrui e país completamente! Con turismo lo wordo afecta, cu por cierto ta Aruba su unico pilar económico? Ami ta di opinion cu Parlamento di Aruba lo no duda pa aproba e presupuesto di e ministerio di husticia ningun momento. Conclusion di e maneho di e minister di husticia: inapto, no pro activo, no determina, falta di conocemento, falta di curashi y amor pa e pueblo di Aruba. Ainda falta pa Aruba por husga e minister di husticia riba su maneho di a deshaci di e radarnan cu su gobierno a yega haya. Tambe di a “mata” Warda Nos Costa. Di a elimina e servicio di e helicopter y e aparatonan mole pa combati ilegalidad. Visibility Team a wordo comberti den un invisible team! E minister no tabata sa mes cu ilegalnan ta drenta na boshi via laman na Colony. Lesando e echonan di e minister di husticia di Aruba, bo por compronde awor si, dicon criminalidad realmente a subi y ta reinando desproporcionalmente na pais Aruba.

Expresionnan haci den e articulo aki no necesariamente ta refleha opinion di ArenaPoliti.co