Den comunicadonan anterior mi a trese dilanti cu a base di estudionan hasi te awo, cu na regio di Noord tin demanda pa un MAVO / HAVO / VWO y na regio di Paradera mester di un scol basico mas aserca. Apesar cu mi ta consiente cu e scolnan ta di super prioridad y cu tin mi atencion, como gobierno bo mester traha pa drecha e situacion financiero economico prome cu cuminsa cu otro projecto. Si bay traha di biaha riba e scolnan cu tin demanda pa nan, como gobierno bo ta bay haya bo ta bay busca un instituto pa financia e scolnan. Bo ta haya bo ta busca financiamento pasobra como gobierno bo mes no tin e manera financiero pa traha nan actualmente. Esey kiermen cu mas financiamento ta mas debe pa pueblo di Aruba. Na e momentonan aki e debe nacional di Aruba ta mas cu 80 % di Aruba su GDP (entrada di gobierno). Kiermen di cada florin di pueblo, mas di 80 cen ta bay na paga debe. E debe cu pais Aruba tin no por core mas for di dje y mester percura pa e no sigui crece. Esey ta hasi cu si bay busca financiamento pa traha projectonan, lo ta un maneho irresponsabel. Pa evita cu debe di Aruba ta sigui crece mester drecha e parti di economia. Pa por drecha e economia bo mester habri mas empleo cu por ofrese mihor salario. Na Aruba na e momentonan aki tin un solo pilar economico, cual cu ta turismo. Si bay sigui crea empleo den turismo, no kiermen cu necesariamento ta bay tin miho salario. Y alaves keda den un solo pilar economico ta hasi bo como pais vunerabel. Bo ta vunerabel pasobra si turismo cay, immediatamente Aruba su entrada ta cay. Momento cu economia di un pais cay, e problema economico ta comberti den problemanan social y criminalidad. E ta comberti den problemanan social y criminalidad, como cu problema economico ta bin cu mas desempleo. Cu empleo of sin empleo hende mester sigui biba. Y personanan cu no tin entrada pasobra no tin empleo, ta di unda nan lo haya di come? Pa es motibo PDR a bin ta traha pa bin cu mas pilarnan economico. Tres pilarnan economico cu PDR a bin ta traha riba nan ta:

1. Reapertura di refeneria, cual na e momento nan aki ta den negociacion y nos lo sigui e desaroyonan.
2. Fast Ferry entre Aruba, Corsou y Boneiro
3. Economia di internet.

Door di estabelece mas pilarnan economico, bo ta crea empleo cu miho salario y mas variacion den profesion. Cual cu ta hasi cu empleadonan actual y esnan den futuro por tin un trabou cu ta pas mas cu nan personalidad. Door di tin miho salarionan riba Aruba, e habitantenan tin mas manera pa hasi nan compras. Door di drecha e benta riba Aruba, bo ta drecha e economia. Cu miho salario, directamente empleadonan lo contribui mas na e premienan di beneficionan social (AZV y AOV) y loonbelasting. Y pa medio di drecha e forsa di compras, directamente comerciantenan ta contribui mas den caha di gobierno pa medio di impuesto cu nan mester cumpli cu nan. Door di expande e economia pa medio di mas pilarnan economico, e GDP di pais Aruba lo mehora y immediatamente finansas publico lo tin mas forsa. Banda di drecha e parti financiero economico, e finansas publico mester wordo maneha na un manera responsabel y cu madurez.

Expresionnan haci den e articulo aki no necesariamente ta refleha opinion di ArenaPoliti.co