Minister Benny Sevinger: Gobierno hunto cu FCCA ta concentra pa sigui mehora y expande barionan
ORANJESTAD – Diaranson mainta, Minister di Infrastructura Benny Sevinger tabata presente na ponemento di prome piedra pa loke ta Fase 3 di proyecto di vivienda comunitario den e compleho di Kiviti na San Nicolas. Minister Sevinger a splica cu esaki ta e prome di varios proyecto cu lo ta iniciando tur siman despues di a firma varios contracto recientemente. “Di e manera aki comunidad por wak cu Gobierno y FCCA ta trahando y lo sigui traha na beneficio di e comunidad,” e mandatario a señala indicando cu 16 miyon ta bay wordo inverti den diferente proyecto den e dianan nos dilanti
E fase aki den e compleho di Kiviti, ta consisti di 16 vivienda cu su construccion ta bou encargo di compania local, ‘Calidad Construction’. Esaki ta un satisfaccion pa e titular di infrastructura, ya cu nan conoce e compania di algun tempo caba y tin un reputacion di ta traha segun reglanan di FCCA y DOW, ademas di duna honor nan nomber. “Asina nos por tin viviendanan di un nivel halto pa nos ciudadanonan,” Minister Sevinger a bisa.
E trabounan aki ta forma parti di henter e vision di Gabinete Mike Eman II y un prueba di e importancia y compromiso ta cu e propio lider di gobierno ta presenta pa pone e prome piedra. Minister Sevinger a felicita su colega Eman pa e vision aki cu ta pone e ciudadano y su derecho na un hogar digno, como un prioridad den e maneho di Gobierno. Minister Sevinger: “Esaki lo contribui na e miho biba di nos ciudadanonan, sigur e 16 cu lo haya nan yabi aki un luna. Pa nos por yama nan bon bini, nan por drenta nan hogar y asina nos lo sigui construi casnan pa comunidad.”
FCCA a concentra hunto cu gobierno den ultimo añanan na mehoracion di calidad di bida den diferente bario. “Nos a renoba diferente bario pa loke ta trata infrastructura, pero renobacion di e cas mes tambe unda cu antes tabatin un cas, pero sin acera, sin zona berde, sin luz of area pa recrea; y awo nos lo sigui cu esey, pero lo bin tambe proyectonan nobo di construccion di cas pa nos comunidad y esey tambe ta importante,” asina e Minister a duna di conoce.
Por ultimo, e mandatario a felicita FCCA, e trahadonan di e compania, e bisiñanan, esnan cu ta bay haya e casnan aki, tambe un pabien di awo; tambe un palabra di pabien na e departamentonan di gobierno cu ta yuda pa e proyecto ta un exito. Minister a finalisando renobando su compromiso y esun di Gobierno henter cu e comunidad aki di pariba di brug. “Nos ta bay wak con nos por sigui expande y mehora e bario aki pa e hendenan di Kiviti.”
Expresionnan haci den e articulo aki no necesariamente ta refleha opinion di ArenaPoliti.co