Prome Minister Mike Eman: “Ciudadanonan kier desaroya nan bario y nos ta sostene nan”
ORANJESTAD – Pa medio di e programa BoBario Prome Minister Mike Eman ta enfocando di manera mas intensivo den Sabana Basora Noord. Manera ta conoci, e compleho di casnan di pueblo ta afronta retonan cu ultimamente a trece nan den un luz menos positivo. “Tin desaroyo cu ta rekeri atencion adicional y nos ta sostene e ciudadanonan cu ta preocupa,” Minister President Mike Eman a duna di conoce.
Despues di a combersa cu hopi di e habitantenan, a bin dilanti cu tin un grupo di persona cu tin un vision pa desaroya e bario den un direccion mas sano y sigur. Pa duna un man den esaki, Ministerio di Asuntonan General a laga Serlimar haci un accion grandi di limpieza rond di e barionan, a pidi Elmar pa drecha e sistema di iluminacion y diasabra ultimo, Minister President Eman personalmente a bay hunto cu boluntarionan, pa drecha e mini veld deportivo.
A haci limpi entre e casnan kitando tur mata y sushi. Aki ta caminda muchanan tabata sconde pa haci maldad. A pidi Elmar pa atende cu palonan di luz cu tabata daña of mester a haci mantencion; awor tur e cayanan ta bon ilumina, creando un ambiente di siguridad. Danki na cooperacion di sector priva y FCCA pa medio di boluntarionan di BoBario, a logra drecha e veld caminda mucha y hobennan di bario ta hunga basketball, futbol y awo tambe volleyball.
Prome Minister Mike Eman ta contento di por ta testigo un biaha mas di e poder di comunitarismo na beneficio di un bario na Aruba. “Hopi di e ciudadanonan di Sabana Basora Noord ta contribuyendo y yudando nos. Nos ta hopi contento cu e forma con e bario ta reaccionando cu e apoyo cu nan ta hayando. Esaki ta laga nan bira mas activo,” asina e mandatario a expresa.
Tin mayornan para cla pa guia e hobennan den bario den practica actividadnan deportivo y recreativo pa asina brinda nan un opcion mas positivo na loke a encontra te awo. Accion di Bario ta continua pasobra Minister President Mike Eman ta determina pa sigui traha na fabor di e pueblo y ta kere den e potencial di nos hendenan.
Expresionnan haci den e articulo aki no necesariamente ta refleha opinion di ArenaPoliti.co