Nuebe ta mas cu shete! No solamente den cifra pero tambe den e costonan cu e ta trece cune riba lomba di pais Aruba y cada cuidadano ora cu Gabinete Eman a amplia e ministerionan. No ta for di awor nos di MEP a vocifera e abuso y acto di sinberguensa aki. Den cuadro di esaki nos lo ta informando pueblo tocante diferente gastonan den Gabinete Eman cual gastonan di cada un bureau no ta un excepcion.

Nos a hasi un analisis di e gastonan di e bureau di ministernan for di tempo cu Gabinete Eman a tuma mando di gobernacion te cu e presupuesto 2015. E cifranan ta indica cu e gastonan di 7 ministernan pa e temporada di 2009-2013 caba tawata mustra un aumento. Pa bai mas den detayes e bureau di 7 ministernan di AVP pe temporada menciona a costa aruba un averahe di 42.3 miyon pa aña.

Pa midi e diferencia nos a compara e cifranan pe 7 ministerionan di MEP na clausura di su gobernacion na 2009. E costo total di e shete ministerionan tawata alrededor di 30.4 miyon. Kiko esaki ta bisabo? Cu for di e momento cu AVP a tuma mando caba a cuminsa na derocha placa di e cuidadano pagador di belasting! Pasobra e diferencia ta aproximadamente 12 miyon compara cu na final di 2009!

Pero sed pa poder y placa di AVP y su integrantenan no a keda te eynan. Na 2013 dos miembro a persisti pa tuma funcionan di minister. Aparentemente pa complace esakinan y cumpli cu promesanan hasi a dicidi pa amplia e ministerionan di 7 pa 9. Esaki ta algo cu den principio gobernador a desanconseha y sr. Mike Eman ta bon na altura di esaki pero a opta pa hasi y deshaci cu placa di pueblo! Pa e ultimo 2 añanan aki (2014 & 2015) segun e cifranan conoci e 9 ministerionan ta costando e pagador di belasting un averahe di 47.4 miyon pa aña. Dus 17 miyon florin mas comparando cu e 30 miyon di gobernacion di MEP.


Ta obvio cu e aumento di coordinadornan ultimo tempo a hasi su efecto tambe. Pasobra den e gobernacion di MEP na 2009 bo tawatin un total di 107 coordinador mientras cu actualmente den 2015 nos ta papiando di 365 coordinador cual ta 244% mas! Awor e pregunta cu ta surgi ta e ministernan di AVP falta di capacidad y conocemento pa por opera? Un cos ta sigur un cantidad ta ganando suma astronomico sin cu di berdad e ta hustifica!

Mester enfatisa cu e gastonan ariba menciona tin di haber cu solamente e bureanan di e ministernan. Un otro analisis cubo por hasi ta di gastonan total di tur ministerionan (incluyendo tur departamento). Si bo hasi un comparacion di e gastonan total di tur ministerionan entre 2015 vs 2009 bo lo nota un diferencia substancial! E diferencia entre e totalidad di ministerionan comparando cu 2009 ta di aproximadamente 160 miyon!! Esakinan ta pruebanan palpabel di un Gabinete sin rumbo y iresponsabel cu e maneho financiero di nos pais. E ehempel ariba menciona ta muestra cu 9 ministerio ta desangrando Aruba financieramente!

Expresionnan haci den e articulo aki no necesariamente ta refleha opinion di ArenaPoliti.co