Fiansa internacional a keda aproba. 

ORANJESTAD - Minister di Finanzas, Angel Bermudez a biaha rumbo pa Hulanda siman pasa pa sigui dialoga cu diferente mandatario y departamento Hulandes pa loke ta trata finanzas publico di Aruba, presupuesto 2015 y tambe e ley cu a regla e procedura di supervision di Aft (Aruba Financieel Toezicht) manera cu a cumbini durante luna di Mei ultimo.

A base di e informenan aki, diabierna mainta Conseho di Minister di Reino a aproba Minister Bermudez su peticion pa por conclui un fiansa riba mercado di capital international pa cubri e deficit financiero di pais Aruba e aña aki.

Na mes momento den curso di atardi a drenta e grato noticia di Standard & Poor’s unda cu nan a establece e rating di credibilidad pa pais Aruba na BBB+ pa 2015. Esaki ta nifica cu e rating di aña pasa a stabilisa y cu poco poco Aruba ta drechando su finanzas publico.

Minister Bermudez ta satisfecho cu e rumbo cu e encuentro y reunionnan ta tumando na Hulanda, “poco poco nos ta estableciendo mas confiansa den e relacion cu Hulanda y esey ta refleha den e reunionnan cu nos a tene te cu awor cu e diferente departamento y mandatarionan”, asina e mandatario a expresa.

Finalmente e mandatario a comenta cu cada paso pa’dilanti ta conta, pero ainda falta basta pa yega na un situacion di finanzas publico duradero.

Expresionnan haci den e articulo aki no necesariamente ta refleha opinion di ArenaPoliti.co