Den un comunicado di gobierno ta hasi como sifuera e pagador di belasting no mester preocupa su mes pasobra ta bin mas tram. Pa colmo manera con e la wordo scirbi ta pa duna e mensahe cu e placa aki no ta di pueblo. Na promer lugar mester pone atención na lo siguiente. Fondo Desaroyo Aruba ta haya un landsbijdrage tur anja for di país Aruba . E placa cu FDA ta haya destina pa projecto ta placa colecta di entradanan di belasting. Dus e placa ta dibo como pagador di belasting!

Pa loke ta trata e ponencia cu e no ta representa ningun gasto extra pa caha di Gobierno esei no mester ta ni den discussion pasobra bo no ta papiando di  1 of 2 trams pero ta papia di 4! Na comienzo y te ainda bo no tin ni un infrastructura apropia pe prome tramnan. Constant tin problema técnico ta presenta y hera e tram no ta core cual ta algo cu automáticamente ta sigui trece gastonan cune. Den presupuesto 2015 ta para cu e 3er y 4to streetcar lo costa pueblo un suma total di 2.4 miyon florin. Ademas di esaki e asina jama “streetscape” tambe tin un costo adicional di 1 miyon pa totalisa 3.4 miyon florin! Pa recapitula 4 trams a costa pueblo aproximadamente 4.8 miyon florin sin conta e inversión inicial! Splica pueblo si esakinan ta of no ta gasto extra?

No ta bale la pena pa bai drenta den discussion cu si e tram mester keda of bai pasobra e tey caba pero si nos kier pone énfasis riba kiko ta prioridad riba nos pais. Actualmente nos país ta den un situación financiero basta precario unda cu mester bai zuinig cu placa. Ademas  tin otro camindanan cu placa di fondo desaroyo por a wordo destina na por ehempel den enseñanza, husticia . Atrobe e pregunta dicon 4 streetcars?  

A menciona cu AruTram ta e departamento encarga cu tram y cu esaki ta wordo maneha dor di e compania estatal Arubus. Den presupuesto 2015 Gabinete Eman a aumenta subisidio di Arubus cu 3 miyon florin mas pasobra esaki tin problemanan financiero pa un tempo caba. Gabinete Eman por wel di bisa cu e placa ta sali di fondo desaroyo pero no lubida cu e gastonan operacional di arutram ta riba lomba di Arubus y esaki ta sangrando financieramente. Gabinete Eman a pensa riba esaki? Of probablemente lo bai surpasa e suma presupuesta pa Arubus atrobe? 

Un cos ta sigur cu no ta por nada Minister di Transporta ta sigui pusha tur cu tin pa e parkeermeternan bira un realidad. Pasobra desesperadamente Arubus mester placa pa por opera e busnan publico, arutram y arupark. Ta di lamenta cu Gabinete Eman ta manipula cu mente di pueblo como sifuera placa di e cuidadano no ta wordo gasta. E ta obvio cu e falta di prioridad y iresponsabilidad ta keda un problema bou Gabinete Eman!

Expresionnan haci den e articulo aki no necesariamente ta refleha opinion di ArenaPoliti.co