Tabatin yen di iregularidadnan rond di e contract 

Minister Otmar Oduber durante encuentro cu prensa a comenta riba e caso di Sr. Lee Tofanelli di Arua Music Festival contra Pais Aruba. Esaki ta un caso cu tin aproximadamente 2 ½ den corte y ta trata di un contrato cu a wordo firma practicamente 5 pa 12 na momento cu Sr. Briesen tabata badonando gobernacion na 2009. E contrato cu a wordo firma tabata pa un duracion di 4 aña, algo cu nunca a tuma lugar anteriormente, ademas a firme pa un suma fiho di 850 mil Dollar cada aña. Es decir, ta trata di un compromiso cu lo a costa Pais Aruba mas di 6 miyon Florin y a wordo haci den un temporada cu ta wordo entrega gobernacion. Huez a dicta cu no tin ningun ‘claim’cu por wordo haci contra Pais Aruba, es decir, Pais Aruba a gana e caso.

Minister Oduber a indica cu e tempo ey el a haya e contrato aki masha ‘fishy’, mirando cu e no tabatin firma, no tabatin MB, ningun hende tabata sa unda e contract aki ta y cierto momento e la aparece den un envelop sin cu ningun hende sa ken a trece ya cu e no tabatin stempel no registratie nummer. Despues cu Minister Oduber a consulta Ministerio Publico y Centrale Accountantsdienst no a honra e contrato aki a pesar cu a entama un caso contra Pais Aruba. E decision a bin pasobra solamente mirando e consehonan cu tabatin prome for di directora e tempo ey di Oficina di Turismo cu tabata contra pa continua pasobra loke tabata hayando a cambio di e placa inverti no tabata manera tabata presenta den e contratonan. A pesar di e consehonan en contra, e mandatario e tempo ey a scohe pa firma un contrato na porta di eleccion marando nos pais na un gasto di riba 6 miyon Florin.

Den e cuadro aki e mandatario a bisa cu a trece aden Sr. Eddie Briesen como esun responsabel a base di e articulo cu ta pone ministernan personalmente responsabel. A pesar cu Sr. Briesen a opone, huez e tempo ey, teniendo na cuenta e pruebanan riba mesa, a bay di acuerdo cu e peticion di Gobierno pa inclui Sr. Eddie Briesen. Esaki pa cu si dia di mañan resulta cu tin algo den desventaha di Pais Aruba, Sr. Eddie Briesen lo wordo poni responsabel financieramente pa cu esaki.

“Den e veredicto di awe, danki Dios pa Pais Aruba y naturalmente pa Sr. Briesen, huez no a haya cu Sr. Tofanelli tin razon, kiermen e decision cu mi persona y Gobierno a tuma tabata esun corecto cu no a honra e contract aki. A base di esey, e mesun veredicto ta bisa cu dor cu Gobierno di Aruba a gana y cu no mester paga ningun placa na Sr. Tofanelli, ta libera Sr. Eddie Briesen di e responsabilidad cu e tabatin pa bay carga e responsabilidad y fondonan cu lo por a yega te na 1 miyon Florin den daño y perhuicio si Sr. Tofanelli a gana”, Minister Otmar Oduber a declara.

E mandatario ta lamenta cu medionan comprometi cu partido MEP  atrobe ta trece dilanti cu Sr. Briesen lo a gana un caso, pero e berdad ta cu Sr. Briesen a pasa dor di wowo di hangua pasobra Gobierno y Minister Oduber a tuma e decision corecto y a gana e caso den corte cu a libera cu Sr. Eddie Briesen no mester para responsabel.

Di otro banda Minister Oduber a expresa cu lo bay delibera cu e huristanan riba e motibonan pakico huez a duna razon na Gobierno, pasobra ta papia di firmanan cu no ta cumpli cu e fechanan cu cual a wordo bisa cu nan a wordo firma manera un contract cu ta bisa a wordo firma na 2008 siendo cu na juli 2009 ainda tin mails di Sr. Tofanelli ta bisa Sr. Eddie Briesen cu ainda no a firma e contract y cu mester firme rapido pasobra ta bin cambio di Gobierno. Tambe huez a bisa cu no ta normal cu ta paga tipo di sumanan asina comprometiendo Pais Aruba pa añanan largo siendo cu nunca a hacie prome ya cu e tabata tuma lugar riba un base anual.

“Ta cosnan hopi straño cu a pesar cu Sr. Briesen a scapa pasobra Gobierno a gana su caso, mi ta kere ta bon pa nos bay mira e cos di cerca y manda e documentacionnan aki pa Ministerio Publico pa mira kico en berdad lo tabata e razon cu e tempo ey tabatin un empeño asina grandi pa cera un contract entre Sr. Briesen directamente (ATA no tabata envolvi y Sr. Briesen a lanta un oficina den su bureau pa firma e contractnan aki, contrario na loke ta tuma lugar awor) y riba cual tin un duda masha masha grandi”, Minister Oduber a indica. 

Expresionnan haci den e articulo aki no necesariamente ta refleha opinion di ArenaPoliti.co