Nos digno pueblo por a tuma nota di nos MinPres actual cu ta admira nos Libertador efm Betico Croes. Un gran Socialdemocrat cu a lucha incansablemente pa logra nos Status Aparte, un lucha cu e pueblo Arubano den su totalidad a anhela pa varios generación. Ta e logro politico aki a buta cu Aruba a bira un di e Islanan mas rico y progresivo den Caribe cu awe nos tin mas di 90 nacionalidad na Aruba.

Locual ta di applaudi ta cu MinPres ta imita Betico manera nan tin algo en comun. Nan no tin nada en comun den sentido di ideología politico. Tambe MinPres ta compara su mes cu e Libertador di India efm Mahatma Gandhi durante su Hongerstaking fracasa durante e presupuesto desastroso di 2014. Ta parce cu MinPres no sa mas con pa bende su mes cu e pueblo di Aruba. E ta admira lidernan politico manera JFK, RFK y MLK tur tres assasina pa motibonan di husticia social/economico. Tur a lucha pa libertad, progreso y equaldad pa nan pueblo. Algo cu Sr. Eman den e ultimo seis añanan no a logra cu su maneho Neoliberal al contrario nos pueblo a perde hopi di su Autonomia y derecho di Autodeterminación. Nos a perde hopi di nos derechonan fundamental cu Liderasgo di Sr. Eman. E ultimo sla mortal ta e protocol firma na Mei 2, 2015. Nos pueblo mester rechasa esaki rotundamente.

Tin desempleo hamas bisto,
Ilegalidad hamas bisto,
Criminalidad hamas bisto,
Inflación hamas bisto,
Abusonan Sexual hamas bisto,
Pobresa hamas bisto,
Persecución politico hamas bisto,
Husticia di Clase hamas bisto,
Medidnan hamas bisto,
Inseguridad hamas bisto,
Hubentud den problema serio,
Nos grandinan cu menos calidad di bida,
Nos Departamentonan Social den problema,
Addiction di droga y alcohol hamas bisto.

Un pais cu tawata gosa di respet den Reino, Region y Mundo awe ta un pais cu e debe nacional di 84.9%, un deficit di 9.3%. Anto ta yega 105% si sigui cu e locuranan di Sr. Eman manera e proyectonan di PPP.

Aruba ta den porta di wordo Re-Colonisa pa Hulanda cu tur e consecuencianan cu lo bini pa nos digno pueblo. Bo mester ta basta delusional pa bo compara bo mes cu cierto figuranan grandi den mundo di politica mientras bo maneho ta mustra net contrario.

Sr. Eman hamas por compara su mes cu lidernan Socialdemocrata cu a lucha contra podernan Economico/Interes Special henter nan bida hasta perde nan hida den nan lucha.

"Cada ken mester biba di loke ta di dje, y esun cu contrae deuda ta biba mas o menos di otronan."

Massimo D' Azeglio

Expresionnan haci den e articulo aki no necesariamente ta refleha opinion di ArenaPoliti.co