ORANJESTAD -- "Ta duel mi hopi cu gobierno di Mike Eman ta trahando asina slordig, asina con cu ta. Ningun pais cu ta respeta su mes ta introdusi aumento di tarifa di belasting durante luna. Un pais cu ta respeta su mes, cu ta respeta norma y balornan, ta planifica su asuntonan mihor" segun Lider di MEP Evelyn Wever-Croes. 

E ta referi aki na e hecho cu den curso di e siman aki e tarifa di e health tax/BBO ta aumenta y subi di 2.5% pa 3.5%. Kiermeen cu siman pasa e tarifa tabata abou. Sinembargo hopi lugar a hisa e tarifa di siman pasa caba y asina ta duna forsa retroactivo na  e medida aki cual ta CONTRA ley. Pero gobierno no ta worry mes y no ta actua contra e abuso ey, pasobra nan sa cu ta mas placa nan ta haya. 
Esnan cu ta factura nan servicionan fin di luna de facto tambe lo factura e tarifa halto riba henter e luna. Tambe ta duna e medida forsa retro activo, siendo cu esey no ta permisible. 

Ta contra tur principio di bon gobernacion y di bon legislacion pa introdusi un aumento di tarifa di belasting cu forsa retro activo. Den casonan asina ta e gobierno mester sali na defensa di pueblo. Pero na Aruba e gobierno aki a lubida riba proteccion di nos pueblo. Unico cos cu e gobierno aki ta pensa ta con pa suta nos pueblo cu mas medida. Ya e sigiente medida ta den preparacion caba. 

"Mike Eman a laga di desea atrobe. El'a priminti di elimina BBO, pero ela aumente. Pa colmo e ta permiti nan introdusi esaki cu forsa retroactivo. Y Eman no por bisa cu e no sa, pasobra ela studia ley y puntra cualquier studiante den su prome anja di ley, ta bisabo mesun cos: bo no por bin cu aumento di belasting cu forsa retro activo. Lamentablemente gobierno no ta interesa den interes general di nos pueblo. Nan ta contento caba cu nan ta haya mas placa pa nan sigi biaha y fiesta" segun Evelyn Wever-Croes

Expresionnan haci den e articulo aki no necesariamente ta refleha opinion di ArenaPoliti.co