Manera ta conoci Parlamento di Aruba lo bai trata e ley di supervision financiero "CAFT" e siman aki. E ley aki a nace y concretisa su mes despues cu Gabinete Eman a firma un protocol dia 2 mei 2015 marando pia y man di parlamento y gobierno pa loke ta maneho di finansas publico.

E ley riba su mes ta describi con e college ta hinca den otro, diferente procedura ora di acorda presupuestonan pero tambe cuentanan annual. Sin lubida e ta describi e pasonan formal cu cada presupuesto of cuenta anual tin cu cana bou di e supervision di CAFT. Remarcabel ta e hecho cu e ley ta contene un cantidad di restriccion y den mesun rosea e ta kita poder di decision di nos pais. Esaki sigur ta algo di lamenta pasobra e esencia di nos Status aparte ta wordo perdi ora cubo NO ta liber mas pa maneha bo pais y otro ta tuma decision pabo!

E accionan y cifranan di e ultimo 6 añanan no solamente a demostra iresponsabilidad, un maneho deficiente pero e la revela tambe cu Gabinete Eman tin un incapacidad enorme pa maneha nos finansas publico. E solo hecho cu e debe nacional a crece for di 2.226 biyon y bira 4.040 biyon (incluyendo cifranan di 2015) ta bisa suficiente. Nos por corda cu na aña 2014 e asunto a bai asina leu cu e la conduci na un Koninklijk besluit y supervision financiero di CFT. Durante e comienso di supervision financiero Gabinete Eman a presenta su Balanced budget accoord (plan di 2013) pa sanea finansas publico. Remarcabel ta cu ora di aplica esakinan den presupuestonan a resulta cu na mas di un ocasion a surpasa nan propio normanan. Mesun storia ta pasando cu presupuesto 2015 pasobra CFT a indica cu Gabinete Eman no a substancia 56 miyon na reduccion cu tawata falta y cu no tin solucion concreto. Pa agrega den e uitvoeringsrapportage 2015 CFT a constata cu a cai atras den logra e obhetivonan y a indica cu tin duda cu e deficit di 2015 lo keda dentro di 3.7%. Asina tin un cantidad di ehempel cu bo por acumula pa splica e incapacidad di Gabinete Eman.

Loke ta di lamenta ta cu Gabinete Eman semper a sconde e realidad financiero di nos pais mientras e tawata bon conciente cu e tawata creando un debacle financiero cu nunca antes Aruba a yega di conoce den su historia cu consecuencianan riba termino largo pa nos futuro generacionan. E ta mas cu obvio cu Prome minister den su afan pa evita di haya un otro KB of AMvRB (cu ta indica incapacidad di su gobierno pa soluciona nos problema financiero) tawata dispuesto pa hasi tur cos cual finalmente a resulta den Ley CAFT (algo cu tanto e la bringa y bai un welga di hamber contra dje). E ta importante pa recorda pueblo cu desde cu nos a haya Status Aparte pa 2009 - den bon y den malo e situacion financiero por a biba cune y nunca a entrega nada! Awe pa sconde incapacidad di su gobierno a core traha Ley di CAFT regalando autonomia financiero di nos pais!

Expresionnan haci den e articulo aki no necesariamente ta refleha opinion di ArenaPoliti.co