Lider di partido Mep ta wordo escohe of selecta? Segun Parlamentario Kelly e respuesta riba e pregunta aki por wordo haya ora cu analisa e trato duna na Sra. Marisol Lopez-Tromp, Sra. Mervin Wyatt-Ras y Sr. Candelario “Booshi” Wever. E personanan aki a haya skop pa danki despues di a contribui enormemente na partido Mep. Parlamentario Kelly ta spera cu esaki lo por fungi como ehempel pa otro candidatonan di Mep cu e ultimo simannan ta wordo uza pa “alaba” nan lider. Si bo tin e anhelo pa bira lider den futuro, percura pa bo faam ta Croes of Oduber, sino bo ta wordo descarta.

Historia di e candidatura di EWC

Si durante e “congreso democratico”  cu a tuma luga dia 2 di oktober 2011 pa elegi un lider nobo di partido Mep, e candidatonan lo tabata e tres personanan aki hunto cu Sra. Evelyn Wever-Croes, ken lo tabata lider di Mep na e momentonan aki? Sra. Evelyn Wever-Croes?
Parlamentario Kelly kier concientisa pueblo di Aruba con e procedura di e candidatura di Sra. Evelyn Wever-Croes a tuma luga y con un “wega” a wordo hunga pa bari e tres personanan aki fe mesa pa asina duna “via liber” na Sra. Evelyn Wever-Croes pa e por bira lider di Mep. Despues di a bari tur competencia fuerte for di mesa e otro dos candidatonan cu a postula nan mes pa bai congreso tabata Sr. Ady Thijssen y Sr. Carl Giel. Esaki segun Mep ta loke bo ta yama un eleccion transparente y democratico.

Sra. Evelyn Wever-Croes a perde tur principio, honor y dignidad ora cu pa oportunismo politico y hamber pa poder el a dicidi di probecha di e “via liber” aki. Na un manera NO elegante el a comberti su mes den lider di Mep. Ta ki nomber bo lo duna tur loke Mep a hasi cu e tres personanan ariba menciona? Tin hopi, pero e prome cu ta bin den mente ta traicion!
Un persona asina awe tin e curashi di yama otro hende pa traidor? Un persona asina tin e curashi di cana hunga “mooi weer” y bisa cu e ta compronde e dolornan di pueblo? Un persona asina ta profila su mes como futuro Minister President? Pueblo mester puntra su mes cu si un dia Sra. Eveline Wever-Croes yega na poder ken ta esnan cu lo sali mas beneficia di esaki? E pueblo di Aruba? Si pueblo sinta pensa bon y analisa tur e echonan aki nos por saca un solo conclusion: Si Mep yega na poder solo lo sali si, pero pa famia y amigonan!

Conclusion

E Mep di Libertador Betico Croes (q.e.p.d.) no tey mas! Parlamentario Kelly ta di opinion cu mirando atras e no por reconoce e partido cu un tempo e mes a sostene. Segun Sr.Kelly e ta contento cu su wowonan a habri y cu e la realisa cu e nepotismo cu ta core den venanan di partido Mep hamas y nunca lo por bolbe conta cu su sosten. Parlamentario Kelly ta orguyoso di ta forma parti di un fraccion y un partido cu ta lucha pa bienestar y desaroyo di pueblo y pais en general y no pa interes di famia y amigonan.

Expresionnan haci den e articulo aki no necesariamente ta refleha opinion di ArenaPoliti.co