Recientemente Parlamentario Jeffrey Kelly a hasi un bishita na Corsow pa asina topa cu diferente personanan cu tin experiencia cu e tema aki. Sr. Kelly a combersa cu entre otro su colega Parlamentario Sr. Wilsoe cu ta ex Minister di Justicia di Corsow cu a yega di bin cu un maneho pa trata e tema aki. Tambe Sr. Kelly a combersa cu presidente di asociacion di musiconan di Corsow, Sr. Manfred “Feco” Gomes pa asina intercambia informacion pa loke ta trata proteccion laboral di musiconan. 

Comision cu ta screen musiconan di afo

Na Corsow a regla e toelating di hendenan cu ta bin di afo pa fungi como musico via un  Ministeriёle Beschikking den e ley di LTU. Esta cu esaki ta bai via un departamento special cu yama Commissie Buitenlandse Artiesten, cu ta encarga cu admision di musiconan di afo. Tur loke ta cai bou di entertainment mester pasa via e comision aki pa advies y pa finalmente haya un vergunning. 

Situacion na Aruba

Na Aruba tin e tendencia di ora ta busca musiconan pa entertainment ta opta pa tuma musiconan di afo, pasobra nan ta cobra mas barata. Especialmente na hotelnan esaki lo ta tumando luga frecuentemente. Te asta ta bai asina leu di kita un yiu di tera y pone un musico of grupo di musico cu ta di afo. Despues cu varios musico a hayanan confronta cu perdida di trabou despues di a toca hopi aña na hotel esaki a bira un punto di discusion cu ta bin dilanti cu mas frecuencia.

Parlamentario Kelly ta enfatisa cu e no tin nada encontra di esnan cu ta bin di afo como musico pa gana nan placa eherciendo e trabou aki, pero mester percura pa nos musiconan local tin preferencia. Si no tin un yiu di tera pa hasi e trabou, e ora ta sondea e posiblidad pa tuma otro hende.

Con leu nos ta

Minister di Labor a instrui un comision forma pa Clyde Burke, Inki Laurens y Robert Jeandor pa encarga su mes cu investigacion riba e situacion aki. Segun Parlementario Kelly a compronde, Sr. Burke lo ta un di e miembronan cu ta hopi activo buscando diferente tipo di informacion pa loke ta trata entertainment na hotelnan. Tambe Sr. Kelly a compronde cu A.M.M.A lo bira A.D.A.A cu ta para pa Asociacion Di Artistanan Arubiano. Esaki ta e asociacion cu lo mester bai encarga su mes cu tur loke ta trata derechonan di nos musiconan local.

Por ultimo Parlamentario Kelly kier hasi un apelacion na tur musico pa para hunto, uni y duna nan mayor aporte y colaboracion pa nan derechonan wordo salbaguardia manera mester ta. Si no tin union entre musiconan local e situacionan lo no conoce un mehoracion.

Expresionnan haci den e articulo aki no necesariamente ta refleha opinion di ArenaPoliti.co