Ex-minister di finansas sr. Nilo Swaen durante Congreso 2015 di MEP: MEP por enfrenta tur reto, sin miedo
STA CRUZ -- Durante Congreso 2015 di MEP dia 27 di september ultimo, sr Nilo Swaen den su discurso a mustra riba retonan cu MEP a enfenta den pasado y pa e motibo ey no mester tin miedo pa ningun reto.
"Na 1992 sr. Nelson Oduber a sa di scrap fecha di independencia. Despues na 1994 Nelson Oduber a sa di habri man y ofrece un ampliacion di gobernacion na Aruba. Na 2007 nos a introduci un belasting indirecto y nos a para mustrando sindicatonan riba consecuencianan di indexering. Awe nos ta scucha cu nos a tratanan malo. Si bo bisa bo jiu cu bo por solamente cumpra 1 short p'e enbes di 2, ta nifika cu bo a trate malo? Esaki ta nifica cubo ta tuma decisionan responsabel pa futuro generacionan. Aunke cu hopi ta esnan cu ta pensa cu nos no mester a tuma e decisionan pero den bida bo mester tuma decisionan pa salbaguardia futuro generacionan y si esaki mester costabo eleccion of poder gubernamental, so be it!
Sra. Evelyn Wever-Croes ta un persona bon prepara, capacita y cu gana y energia pa traha pa Aruba. Bo ta na cabes di un partido grandi cu tin un forsa democratico hopi fuerte cu a maneha Aruba basa riba principionan. Rond dibo ma mira personan cu a desaroya den lidernan riba nan mes. Ma mira hobennan cu energia fuerte cu gana pa traha pa Aruba. Hasta tin esnan cu experiencia amplio desde 1986. Bo contactonan internacional y bo experiencia academico tin balornan agrega pa maneha nos pais. Ademas di tur esakinan bo ta un mama y por papia di experiencia propio con bo ta mira bo jiunan den nan wowo.
Esakinan ta cualidadnan hopi fuerte y mi ta sigur cu abo lo sa di maneha nos pais riba un nivel cu nos tur ta spera. MEP no mester tin miedo, e tin un gran persona pa lidera y saca Aruba for di e problemanan financiero manera semper e la sa di hasi", tawata palabranan di ex Minister di finansas Nilo Swaen.
Expresionnan haci den e articulo aki no necesariamente ta refleha opinion di ArenaPoliti.co