Hopi gradicimento pa Prome Minister Eman y su Gobierno pa tur mehoracion 

ORANJESTAD – Prome Minister Mike Eman a bishita e bario residencial Primavera y por a mira con e cambio cu su Gobierno a priminti a wordo ehecuta. El a topa cu caranan contento y gradicido pa e mehoracion cu tin awo.

Primavera ta un bario cu a wordo desaroya den añanan ’90 ora cu DIP a haci un verkaveling grandi pa cuminsa otorga tereno pa cual tabatin un demanda grandi. El a keda un bario bunita pero pa añanan lago infrastructura a keda incompleto. Pesey mes, e peticion mas a pidi pe tempo cu Prome Minister Eman a bishita e bario algun tempo durante un Accion di Bario tabata mehora di e infrastructura. Diahuebs el a bolbe y mira pa su mes con e infrastructura a cambia henter e bista di e bario. E ta algo cu e habitantenan tabata masha agradecido na dje y a expresa esaki tambe. “Hopi bunita nos bario a keda, el a haci un diferencia grandi,” un sra. di edad a expresa y a agrega cu tin algun area cu ainda falta.

Despues di e infrastructura bunita, un molester cu a keda ta e trafico, principalmente ocasiona pa esnan cu ta core cu velocidad halto. E caminda na Primavera ta un conexion entre e parti pazuid cu e area di Hooiberg / Santa Cruz pa cual e ta wordo hopi uza.. Algun habitante a haci apelacion na e mandatario pa instalacion di verkeersdrempels, cual peticion tin atencion di Prome Minister.

Pa e mandatario mes e bishita aki tabata uno hopi positivo, mirando e cambionan, e embeyecimento, pero tambe pa mira con e bario a crece den tur aspecto. Incluso tin Club Primavera unda durante siman rond di 200 mucha ta haci uzo di e club den nan sesionnan di training y bisiñanan ta haci uzo di su facilidadnan pa entre otro ‘Zumba’. Por mira con e club y e habitantenan ta uni y ta e bibo ehempel di e comunitarismo cu Gobierno di Aruba ta promove.

Prome Minister Eman a bishita e bario cu Bus di Salud, cu a wordo staciona dilanti Club Primavera cual a haya hopi cliente e mainta aki y el a haya hopi abraso y palabranan di gradicimento for di e habitantenan contento cu su bishita ya cu “ningun gobernante a yega di bishita nos pa scucha nos preocupacionnan,” e Presidente di Fundacion Social Cultural Club Primavera Nilo Gomes da Silva hopi orguyoso a expresa para banda di e mandatario.

Primavera ta ehempel di cambionan cu a wordo introduci door di Gabinete Mike Eman I y II. “Tin mas cos cu nos mester haci. Tin mas caminda cu mester wordo drechi y mester mas iluminacion y tur lo bini sigur,” Prome Minister Eman a bisa.

Expresionnan haci den e articulo aki no necesariamente ta refleha opinion di ArenaPoliti.co