Minister Otmar Oduber ta comenta riba e fenomeno di e bishitantenan Venezolano 

Riba iniciativa di ATA a acerca un consultorio for di Venezuela cual cu den e siman tras di lomba a reuni cu varios instancia pa mustra asina tambe e atencion cu nos ta brinda na e situacion economico, social y politico cu tin actual na Venezuela, cu ta conduci na un gran cantidad di Venezolanonan cu ta biaha pa Aruba.

Pa e Minister di Turismo tabata importante pa tur gremio, comercial y tur institutonan pa por haya un impresion di kico e desaroyo tabata e ultimo añanan, kico e situacion real ta na nos pais bisiña y kico e pronosticonan ta. E mandatario ta sigui bisa: "Di e forma aki tur hende por tin un opinion conforme e realidad cu ta biba na Venezuela na e momentonan aki, y tur hende por carga e responsabilidad tambe di e consecuencianan cu esaki tin pa Aruba. Hopi biaha ta mustra den direccion di Turismo como si fuera cu nos ta atrae e bishitante aki y mi ta kere den un forma hopi cla, durante e presentacion a bin dilanti, cu e situacion na Venezuela ta loke ta crea e salida di e Venezolanonan y ta busca den cercania un forma facil pa por genera un cantidad di fondo pa hiba bek nan pais."

Durante e presentacion a haya un splicacion claro cu pa e personanan cu ta keda 3 anochi, cu ta e fenomeno cu mas nos ta mira aki na Aruba, ta ricibi e maximo suma cu nan por haya cual ta 700 Dollar for di Gobierno Venezolano y adicional si nan tin muchanan menor di edad nan ta haya un suma adicional di 300 Dollar. Minister Oduber ta sigui splica: "Pa bo cumpra e dollar ey e ta sali un 13 bolivar, pero ora bo bin bek cu e Dollar na Venezuela riba mercado preto, nan por cambia esaki na un balor di 870 Bolivar. Esaki ta significa pa e personanan aki un 45 luna di salario minimo na Venezuela. Ta trata aki di riba 3 aña y mey cu e hendenan aki lo por biba na Venezuela basa riba e fondonan cu nan ta cambia."

Durante e presentacion a discuti tambe e posibilidadnan pa frena e fenomeno aki pa nos isla mirando cu hopi ta mira den direccion di Gobierno, pero awor miho informa ta mira cosnan diferente. Sr. Oduber: "A papia riba e consecuencianan di introduci un visa of pa elimina e Cadivi cu ta e posibilidad di cumpra e dollar. Na un forma hopi cla a keda demostra cu tur dos lo trece repercusionnan hopi fuerte politicamente na nivel diplomatico si Aruba tuma e pasonan aki. Locual si a keda demostra ta cu e responsabilidad por keda reparti. E sector comercial  por ehempel por evita, mescos cu banconan a purba haci den e situacion di e fenomeno di raspa, di regula cierto tendencia di por ehempel e rebendemento di cerbes. Gobierno no por regula esaki."

E mandatario ta comenta cu den un situacion asina aki ta tur hende hunto mester pone man pa atende cu un situacion cu no tin nada di haber cu mercadeo di Aruba como destinacion, pero mas bien un situacion socio, politico y economico cu tin na Venezuela. E mandatario ta finalisa bisando: "Ta premira cu e situacion lo no mehora, mirando cu tin eleccion na caminda y e bolivar ta sigui devalua, haciendo e mas atractivo pa e grupo aki bin Aruba djis pa raspa e dollar y bay bek nan pais. Conhuntamente nos mester tuma accion pa haci e menos atractivo pa e personanan aki mira Aruba como un bon opcion pa raspa carchi y bay bek pa via di nan situacion financiero."

Expresionnan haci den e articulo aki no necesariamente ta refleha opinion di ArenaPoliti.co