"Mi ta mas preocupa awor, despues di a scucha CAFT" 

ORANJESTAD -- E presidente y miembronan di comision di supervision CAFT a reuni cu Parlamento diabierna ultimo.
"Durante e reunion CAFT comparti nan preocupacionnan pa cu e situacion financiero, manera expresa den nan rapportnan publica. E contenido di e reunion mes ta confindencial, pero basicamente ta igual cu locual ta poni riba papel y publica riba e website di CFT.
Hopi hende ta puntra nos dicon CAFT no ta tuma accion contra gobierno, pesey ta importante pa recorda tur hende cu CAFT NO a bin pa tuma accion contra gobiernho. Nos a splica esey extensamente caba prome cu e CAFT a bira ley. CAFT ta simplemente un organo cu ta duna conseho.
CAFT ta duna conseho na gobierno con pa atende cu finansas publico, pa evita cu gobierno ta viola su propio reglanan.
CAFT ta duna conseho na parlamento con pa controla gobierno mihor.
CAFT ta duna conseho na Conseho di Minister di Reino, con e situacion real ta na Aruba.
Pero CAFT no por tuma accion. Ta cada instancia mester carga su propio responsabilidad. Si gobierno no kier sigi conseho di CAFT, ta keda na Parlamento pa presiona gobiernho. Pero pa esaki pasa realmente mester di e mayoria pa eherse e presion aki.
Y si Parlamento no kier hasi esaki, y ora ta keda na Conseho di Minister di Reino pa tuma accion.
E maneho financiero di Aruba no ta manera cu e mester ta, y manera CAFT a pone den nan rapportnan, e presupuesto ta irealistico. Tanto e entradanan cu ta mucho halto, como e gastonan cu no ta corta suficiente.
E bala awor ta den scochi di gobierno pa mira si e ta cambia e presupuesto prome cu mande pa Parlamento. Y e gran pregunta ta, si Parlamento kier asumi su responsabilidad despues di esey si gobierno no cumpli. MEP ta dispuesto pa asumi e responsabilidad ey, AVP ta dispuesto?" lider di MEP a finalisa puntrando.

Expresionnan haci den e articulo aki no necesariamente ta refleha opinion di ArenaPoliti.co