Siman pasa Fraccion di MEP a haci un peticion pa un reunion publico cu Minister Dowers riba e escalacion di criminalidad na nos Pais. E peticion aki a wordo haci conforme articulo 23 inciso 3 di Reglamento di Ordo cual ta e Ley cu tur Parlamentario y Presidente di Parlamento mester atene su mes na dje. Pero enves di yama e reunion publico cu a ser pedi, e Presidente di Parlamento riba su mes y contra Ley a yama un encuentro cu Minister Dowers. Nos a critica e hecho aki y awe e Presidente a sali splica dicon ela tuma e decicion aki. Na nos parecer, e Presidente di Parlamento no tin ningun excusa valido pa a keda sin yama e reunion publico riba escalacion di criminalidad na nos Pais.

Presidente ta dicidi su mes 
E Presidente di Parlamento segun Ley tin e prerogativo pa dicidi riba ki dia un reunion ta wordo yama. Pero segun Ley e Presidente no tin e autoridad pa dicidi den ki forma e reunion ta wordo yama. Si Fraccion di MEP pidi un reunion publico conforme articulo 23 inciso 3 di Reglamento di Ordo di Parlamento, ta un reunion publico e Presidente di Parlamento mester yama. E Presidente riba su mes no por dicidi di yama un encuentro of un reunion di comicion, pasobra e Presidente NO ta para riba Ley.

Agenda di Parlamento ta yen
Un otro excusa cu e Presidente di Parlamento a trece dilanti ta cu e agenda di Parlamento ta yen. E problema no ta e agenda di Parlamento, mas bien e problema ta cu e Presidente su viahe di placer ta plania caba y ta pesey automaticamente no tin espacio mas pa ningun reunion publico.

Reunion publico ta dura oras largo
E Presidente a trece dilanti cu un reunion publico ta dura oras largo. Esaki tambe ta un excusa fofo ya cu un reunion publico no necesariamente mester dura largo. Ata por ehempel ora esnan di AVP a reuni riba e Ley di politieke ambtsdragers pa drecha nan pocicion huridico como politico, esaki a dura solamente 6 minuut. Pesey no por bisa cu tur reunion publico ta dura largo. Si haci afspraak manera hende grandi, e reunion publico por a tuma lugar masha liher.

No tin excusa pa no a yama e reunion publico
E Presidente di Parlamento mes no a duna Fraccion di MEP por escrito e motibonan pakiko ela yama un encuentro enves di un reunion publico. Pero for di e splicacion cu e Presidente a duna awe den prensa ta bira bisto cu e Presidente di Parlamento no tin ningun excusa valido pa a keda sin yama e reunion publico riba escalacion di criminalidad na nos Pais.

18 december 2015

Expresionnan haci den e articulo aki no necesariamente ta refleha opinion di ArenaPoliti.co