Partido ABO: E ta asina dificil pa gobernantenan conta e berdad. Abo no merece miho?
Desde algun tempo, el’a bira hopi dificil pa haya informacion/data actual di gobierno. Hasta e departamento di estadistica (CBS), no ta publica e informacion/data actual mas. E poco informacion cu si ta disponibel, hopi biaha e ta informacion/data bieu. Pues e pregunta ta dicon gobierno no ta haci informacion/data accesibel mas pa pueblo?
Algun hende, y sigur algun politico, lo culpa e ambtenaarnan pa esaki atrobe. Pero nos di partido ABO, ta kere cu e tin mas di haci cu un cultura di indoctrinacion y manipulacion di parti di partidonan politico tradicional. Pasobra menos informacion/data cu wordo produci y comparti, mas e gobernantenan por gaña y manipula pueblo pa falta di informacion/data imparcial, cu por desenmascara nan fabula of engaño politico.
Un simpel ehempel ta esun di cuanto hende cu no tin trabou actual na Aruba. E departamento di Labor (DAO) no ta publica e informacion/data aki, mientras segun e ultimo informacion di CBS (segun nan website), e cifra di desempleo tabata 5.7% na 2007. Dus di 9 aña pasa!
Segun diferente comunicadonan di gobierno, e cifra di desempleo awor ta na 7.5%, cu antes tabata na 10%. Sin informacion/data oficial y actualisa, esaki ta dificil pa un hende verifica. Pero si nos tuma e ultimo rapport di ‘International Labour Organization (ILO)’ cu a wordo publica na december riba e desempleo di 2015 pa e region, ILO ta papia di un desempleo promedio di 6.7% pa e region. Dus di tur forma e cifra di desempleo di 7.5% cu gobierno ta bisa pueblo, ta mas halto cu e promedio di e region y hopi mas halto cu esun oficial di CBS.
Un otro ehempel ta e anuncio di e minister di Labor y e minister-president na fin di aña cu e aumento di e salario minimo cu 2.5%. A pesar cu e ‘gran anuncio’ aki no lo haci mucho pa mehora e forsa di compra, e dos ministernan a bende pueblo esaki como e salbacion pa e miseria cu e mesun gobierno aki a hinca e pueblo aden cu hopi show y proyectonan miyonario cu solamente ta beneficia un grupito selecta. Awor na januari ta resulta cu DAO ta bisa cu e no ta un aumento di 2.5%, pero uno di 2.2% (Bon Dia Aruba, 5 januari 2016)!
Preguntanan cardinal:
- E ta asina dificil pa un gobernante/politico ta sincero cu e pueblo y bis’e e berdad?
- Dicon pueblo ainda, na aña 2016, ta acepta e maltrato politico aki?
- Dicon pueblo of parlamento no ta exigi informacion/data actual di gobierno?
- Den e famoso protocol di 2 mei 2015, e gobierno actual a admiti cu e calidad di informacion/data na Aruba ta cuestionabel y a palabra cu Hulanda pa mehora esaki. Dicon ainda pueblo no ta mira nada di e mehoracion aki?
- Abo pueblo, bo no merece di conoce e berdad of tin politiconan sincero y honesto?
Expresionnan haci den e articulo aki no necesariamente ta refleha opinion di ArenaPoliti.co
Articulo similar
7 motibo pa laga Pueblo eligi su Gabinete
Columna Asiento 22 | S01E05 Hopi ciudadano ta na fabor di un cambio den nos sistema democratico cu lo duna Pueblo e poder pa eligi Parlamento y un (minister-)presidente den eleccionnan separa. De...
Sigui lesa...