E conmemoracion of celebracion di e di trinta aña di Status Aparte di Aruba, lo sosode na diferente forma y na diferente momento den e aña aki. Tin algun organisacion cu ya a pensa y ta prepara momentonan pa haci esaki. Rond di e fecha historico di 18 di Maart sigur lo tin hopi actividad. Un celebracion pa e di seis lustro di Status Aparte di Aruba ta completamente na su lugar. E ta sin duda un momento di celebra! Pero e ta tambe un momento pa wak con nos pais, nos gobernacion, nos institucionnan y nos comunidad a desaroya den e trinta añanan aki. Ta masha importante pa nos evalua con nos "norma y balornan" como pais a cambia y kico a sosode cu e idealnan cu nos tabata tin y ainda tin pa nos pais y pa nos pueblo. Un bon combinacion di e ocasionnan di celebracion, cu momentonan di refleccion pa nos tur, den tur sector y circulo den nos comunidad, ta probablemente e miho forma pa conmemora e di trinta aña di nos Status Aparte den Reino.

PARLAMENTO
Den e trinta aña cu a pasa Parlamento a hunga un rol sumamente importante. Awe e Parlamento di Aruba, no ta e Conseho Insular ("Eilandsraad") cu funcionnan limita di prome cu 1986. E Parlamento di Aruba a demostra na hopi momento di por asumi responsabilidadnan pa henter nos pais y di tuma desicionnan importante den forma responsabel. Pero tog e Parlamento di Aruba, pa hopi den comunidad, ainda no ta loke a desea pa e ta. Ainda e falta pa crece. Tanto den su organisacion, den su forma di tuma desicion, como den e forma di comportacion di su miembronan. No por tin niun miembro di Parlamento cu no lo reconoce esey. E ocasion di celebracion di e trinta aña di Status Aparte ta duna e Parlamento di Aruba pesey tambe e oportunidad pa scohe pa crece, cambia y mehora den tur sentido. Un of mas desicion di miembronan di Parlamento mes pa cambia e forma di traha lo mustra cu miembronan di Parlamento mes ta wak e funcionamento di Parlamento cu un bista critico y cu a scucha loke hopi den comunidad ta haya di e Parlamento. Na un of mas momento den e aña aki Parlamento lo por  tene debatenan serio riba democrasia den nos pais, riba con cada uno di nos ta contribui na desaroyo di nos pais y participa den e frutanan cu nos pais ta duna. Un of mas debate publico y cu comunidad, riba e rumbo di desaroyo y futuro di nos pais, riba e posicion di Aruba den Reino y riba e balornan cu mester ta central pa tur loke Parlamento haci den nomber di Pueblo, ta sigur na su luga. Un "consenso nacional" riba e normanan cu nos lo usa awor y den futuro pa midi desaroyo di nos pais riba hopi tereno, lo fortifica nos union como pueblo y lo haci debatenan nacional mas racional y menos emocional. E rol aki, di yuda crea un plataforma di balor y normanan nacional, por ta e miho contribucion cu Parlamento di Aruba lo por duna na e aña di conmemoracion di Status Aparte. Fraccion di AVP ta pensa di propone accionnan asina, cu hobennan, cu sector social, comercial y sindical pronto. Pasobra futuro di nos pais ta pa nos tur y e ta depende di nos tur.

Expresionnan haci den e articulo aki no necesariamente ta refleha opinion di ArenaPoliti.co