Un di e prome accionnan di e gobierno di Mike Eman y AVP, despues di a asumi responsabilidad gubernamental, tabata pa boycotea deliberadamente e facilidad super moderno y completo cu e gobierno den cua mi persona tabata encarga cu Salubridad, a ehecuta na San Nicolas.

Un instituto medico cu mester a duna e pueblo di San Nicolas y Aruba en general un cuido medico di calidad halto y sofistica, a para bira un instituto bashi na unda poco poco e pueblo ta wordo priva di e cuido medico di un bon calidad.

Un di e prome cosnan cu a ser haci tempo cu ami tabata responsabel pa ImSan, ta e hecho cu a transforma por ehempel e "ambulancevervoer" pa "ambulancezorg".

E intencion y meta tras di e cambio aki tabata pa garantisa esnan cu mester a haci uso di ambulance, un servicio di calidad halto cu expertonan paramedico y personal adecua, pa asina evita cu e cuido di ambulance cay back na un transporte di ambulance manera e tabata antes.

Un paar di dia prome cu fin di aña pasa nos a tuma nota di e hecho cu un patient a fayece den cura di Imsan. Segun e familiarnan a declara, pa motibo di negligencia di e dokter na warda.

A ser priminti cu lo percura pa haci un investigacion profundo, sinembargo e director mesora a sali na defensa di e dokter sin cu a warda e resultado di e investigacion.

Te hasta a tilda e famia cu nan kier a hunga huez y ministerio publico alabes.

E director di Imsan parce ta midi cu dos midi, pasobra hunto cu e director di AZV sí a haña ta bon pa hunga huez y Ministerio Publico den e caso di dr. Jaramillo.

Pa colmo nos a bin compronde cu e siman aki atrobe un otro conciudadano a wordo manda cas sin cu ela wordo atendi adecuadamente, pa despues di un rato fayece na su cas.

Na 2009 a ser laga atras un instituto hospitalario excelente cu tabata brinda un cuido medico di un calidad halto. Sinembargo pa motibonan politico partidista y infantil a degrada e hospital "full fleched" aki den un simpel Centro Medico, lagando aparatonan sumamente moderno y sofistica bay perdi. Esaki a conduci cu masha hopi hende no por a ser atendi manera mester ta den momentonan di emergencia, manera tabata e caso di e persona cu a muri den cura di Imsan y esun di e siman aki.

Si a sigui cu e proyecto Cardiovascular, e patientnan aki probablemente por a ser scapa, mescos cu hopi mas hende, pa motibo cu no por a haci uso di e aparatonan cu tanto Visser como Schwengle deliberadamente a laga putri.

Ta cuanto hende mas mester muri pa e gobierno aki realisa cu ta un crimen nan ta cometiendo contra nos pueblo en general, y e pueblo di San Nicolas en particular?

E mas reciente crimen ta e hecho cu despues cu na 2009 tabata tin 2 "Dokter di Cas" den Imsan, e director a haci su maximo esfuerzo pa caba cu e cuido aki den Imsan.

Y despues cu recientemente e ultimo Dokter di Cas a retira, e director no a para ariba cu e dokter di cas nobo lo bay eherce su profesion den Imsan, pero deliberadamente a laga e Dokter di Cas nobo bay traha na Pos Chikito.

Consequencia directo di e esaki ta cu un biaha mas por lo menos 2000 sernan humano di San Nicolas, cu na pia por a bay nan dokter di cas na ImSan, awor mester cana un caminda di cruz pa yega cerca e dokter na Pos Chikito.

Atrobe ta e ciudadanonan di San Nicolas ta e victima di falta di vision y falta di maneho di e gobierno di Mike Eman.

Un biaha mas ta keda demostra cu e minister di Salud Schwengle ta un desaster cu no solamente no tin un vision, pero cu esaki ta formando un peliger pa bida di hende.

Ta p'esey nos ta bisa cu ImSan ta birando un "Spookhuis", pa motibo cu e lugar poco poco ta birando bashi, ya cu no ta haci uso di e aparatonan moderno y di un technologia avansa, pero tambe pa motibo di e cantidad di hendenan cu ta fayece despues cu nan  ta ser manda cas sin cu nan ta wordo atendi manera mester ta.

Esaki ta djies pa motibo di falta di vision di tanto Visser como di Schwengle.

Den nomber di Union Patriotico Progresista – U.P.P.

Candelario A. S. D. – Booshi – Wever

Brazil, januari 16, 2016