Algun dia pasa ministro di Finanzas sr. Angel Bermudez a duna un declaracion masha saco mes esta cu e anja aki lo jega un final na Fondo Desaroyo di Aruba (FDA) cu tabata worde financia tanto pa gobierno Hulandes como pa gobierno di Aruba y cu despues lo sigui un otro fondo cu lo worde financia solamente pa gobierno di pais Aruba.

Ministro Bermudez NO a bai den e historia di FDA y e hecho cu e ta jega su final pero PPA ta sinti nos deber pa splica nos pueblo y sigur e generacionan joven di nos pais kiko tin tras di e asunto aki y cu aki ta trata otro ‘eror historico’ di parti di gobernacion di partido AVP.

AJUDO ECONOMICO HULANDES…!

Desde cu Statuut pa Reino Hulandes a worde firma Aruba e tempo ey como teritorio Insular a ricibi un corriente di ajudo economico hulandes. E ajudo economico hulandes junto cu ajudo economico di Mercado Comun Europeo y presupuesto pa Teritorio Insular di Aruba tabata e fondonan cu a juda desaroyo e isla di Aruba.

Na 1986 tempo cu a logra convence Aruba pa firma pa su Independencia entrante 1 di januari 1996 y un Status aparte pa diez anja desde 1986 a aproba cu ajudo economico Hulandes lo continua. Despues gabinete Oduber forma pa MEP, PPA y ADN a logra kita e fecha di Independencia pa Aruba keda cu nos Status Aparte indefeni ! Durante tur e periodo aki a keda palabra cu Hulanda lo sigui duna Aruba ajudo economico hulandes cual a keda juda Aruba den projectonan social-educativo- economico.

EROR HISTORICO DI AVP !!

Durante e periodo di Gabinete Henny Eman 3 cu sr. Robertico Croes como ministro di Finanzas, gobernacion Eman(1994 – 2001) a projecta su mes cu Aruba ta un Isla rico y cu Aruba lo duna ajudo economico na otro isla den Caribe p.e. un aeropuerto den Caribe y un ‘free zone’ na Venezuela. Esaki a hala atencion di gobierno di Reino cu a manda jama Eman/Croes inmediatamente. Final di e reunionan aki tabata cu gobierno hulandes a forza Aruba (gab. Eman) pa firma pa e FINAL di ajudo economico hulandes. E tempo ey AVP a bende nan ‘eror historico’ como un intencion sagrando pa Aruba para riba su propio pianan. Un mentira flagrante pasobra locual nan a causa tabata cu Aruba a perde su ajudo economico Hulandes cu Aruba tabatatin desde 1954.

Den e protocol cu a firma pa e FINAL di ajudo economico hulandes nan a pone cu esaki lo sosode den dos fase…..uno cu un Fundacion Desaroyo Aruba unda Hulanda como Aruba lo pone fondo durante di DIEZ anja pa despues bai over na e fase final na unda Aruba su so lo sigui financia su inversionan economico y Hulanda lo ta liber di TUR deber financiero !!

PPA tabata e UNICO partido cu a critica e intencion aki seriamente y a cualifica e intencion aki como contra nos Statuut pa Reino Hulandes unda ta worde poni cu e Capitulo 3 di cooperacion den Reino basa riba e situacion di kada uno….te awe esaki ta punto di bista di PPA !! Hulanda a abusa di Aruba door di e pretencion sokete di gabinete Henny Eman.

Locual Ministro di Finanzas sr. Bermudez a papia di djele pues ta e fase final …..esta justamente ‘meimei’ di e crisis financiero di pais Aruba unda Aruba no tin ni placa pa paga su debenan corda pa inverti den un maneho correcto den e necesidadnan economico di pais Aruba.

Cu otro palabra pa motibo di ‘bobedad’ AVP a pone nos pueblo perde nos ajudo economico hulandes cu nos tabata tin derecho riba djele y nos a kaba di perde un parti substancial di nos autonomia financiero cu Aruba tin desde 1954 y cu a word expande na 1986 cu nos status aparte.

Aki e pueblo di Aruba a worde seferamente perjudica a consecuencia di otro ‘estupidez’ di marca major di gabinete Mike Eman(AVP) …..ta cuanto vez mas e partido berde tin di perjudica nos pueblo di Aruba y no lubida aki majoria projecto cu ajudo economico hulandes a bai den necesidad di pueblo y sigur e pueblo pober den educacion y den projectonan social manera cas di pueblo etc…etc….den pasado!

Ta un dia ‘scur’ oro cu esaki bira realidad. Aruba no tin suficiente fondo pa cumpli cu tur su debernan y sigur no durante di un ‘crisis financiero’ hopi serio. PPA lo opone esaki serca autoridad hulandes na momento cu pueblo duna nos e sosten pa duna pueblo un representacion/gobernacion digno !!

Aruba, 10 januari 2016
Lider Politico di PPA
BENNY NISBET

Expresionnan haci den e articulo aki no necesariamente ta refleha opinion di ArenaPoliti.co