Benny Nisbet (PPA): “Ta hora pa analisa nos destinacion turistico den tur forma.... Y mira unda por mejora nos producto turistico y diversifica nos destinacionan!!”
Anja 2015 ta historia mientras cu 2016 ta nos dilanti…..! PPA ta di opinion cu mester analisa nos producto turistico pa mira unda Aruba ta fuerte y unda Aruba ta menos fuerte. Pa conclui unda Aruba lo por inverti mas energia y fondo pa mejora nos producto turistico cu nos ta ofrece nos bishitantenan pero na mes momento con nos por diversifica nos mercadonan turistico den exterior pa a la fin nos ‘upgrade’ nos entrada turistico. Na mes momento ta un hecho cu Aruba en grande a depende solamente di nos pilar economico Turismo ultimo anjanan cual a demonstra cu e escogencia hopi anja pasa door di PPA/sr. Juan Enrique Yrausquin pa inverti den turismo tabata un decision y un maneho eloquente. Awe nos Isla ta simpelmente biba riba e rikeza di e maneho aki.
Esaki ta trece cu nos e pregunta unda nos Isla su maneho lo por ta:
PPA su vision ta scoge pa:
- Aruba mester inverti den e MCI sector esta den atrae mas conventions pa nos Isla y mejora e infrastructura pa por carge un desaroyo asina.
- Aruba mester inverti den un ‘International Golf Course’ acerca na San Nicolas cual lo por juda pa por bende su mes un poco mas na e ‘golfersmarket’.
- Aruba lo mester hiba un maneho pa prepara Aruba den e sector di “Health & Wellness’ un sector cu ingreso ‘biljonario’ den mundo como cu hopi turista awendia ta mara nan vacacion na e oportunidad di atende cu nan salud tambe. PPA desde 2005 ta e unico partido politico cu ta boga pa esaki como cu nos ta di opinion cu e lo por crea cuponan di calidad pa nos pueblo y un major entrada for di e sector aki.
- Aruba mester scoge pa ‘upgrade’ su product turistico door di inverti den ‘San Nicolas Our Caribbean Town’ un producto cu lo por hala hopi turista si e worde bon prepara y pa pueblo di San Nicolas e lo nifica un movecion economico hopi mas miho.
- Aruba lo mester mejora su posibilidadnan di compras y bende Aruba como un ‘shopping destination’.
- Dedica atencion na un of mas haf di Jate……!!
PPA ta di opinion cu tanto gobierno, ministro encarga cu turismo, Parlamento di Aruba y A.T.A. lo mester dedica atencion na nos turismo y analisa con pa mejora nos producto na prome lugar sigui pa diversificacion di nos mercadonan pa asina nos pueblo por saca mas for di esaki.
Y naturalmente como henter nos pueblo ta biba di turismo mester analisa na forma critico unda e fondo cu nos ta genera como destination turistico realmente ta bai y na ki porcentahe ? Ki parti ta bai pa otro ‘partnernan’ den e sector grandi di turismo ? Ki parti ta keda pa nos como e destinacion turistico ? Y con esaki ta worde reparti dentro di nos Isla di Aruba den su totalidad ? Nos ta convensi cu e lo resulta un topico hopi interesante y lo causa hopi discussion necesario y ainda mas interesante.
Aruba, 17 di Januari 2016
Lider Politico di PPA
BENNY NISBET
Expresionnan haci den e articulo aki no necesariamente ta refleha opinion di ArenaPoliti.co