Ultimo tempo diferente politiconan tradicional ta core campaña caba cu un posibel reapertura di e refineria. Akinan nos ta mira con e politiconan tradicional ta abusa di e memoria cortico di e pueblo. E ta comparabel cu un hende cu a bende bo persona un pakete turistico di luho, pa despues resulta cu el’a tira’bo den un desierto sin awa y sin cuminda. Y net prome cu bo muri, e ta trece’bo dos gota di awa y asina aparenta di a salba bo bida. E refineria a wordo uza manera cabay di campaña na 1983, 1989, 2009, 2013 y awor atrobe. Den tur e añanan cu e refineria a wordo uza manera cabay di campaña, e unico cu realmente e refineria trece pa e isla ta algun cupo di trabou. Poco inversion a wordo haci y locual mes a wordo inverti, a wordo desconta di e impuesto. E realidad amargo ta cu desde 1986 tur operador di e refineria, a haya diferente ‘tax holidays’, ‘settlements & agreements’, uno hasta a haya un subsidio di salario cu pueblo mester a paga cu e ceramento ficticio na 2009 y por a contamina e medio ambiente na nan antoho. Tur esaki pa algun cupo di trabou cu algun politiconan tradicional cu poco of sin vision a regala e operadornan.  E politiconan tradicional parce a logra di haci e pueblo adicto na refinamento y na e forma antiguo di negocia cu un operador, ta e unico forma.

Partido ABO ta e unico partido politico cu a bisa cu e refineria mester ta den man di pueblo, pa por tin un miho punto di salida di negociacion y asina su futuro. Algun hende a critica e postura aki, pero awendia tur nan a lubida nan critica y hasta nan ta aplicando locual partido ABO a bisa. Tuma e postura over sin un vision of sigui aplica e mesun forma tradicional di negocia, lo resulta cu Aruba atrobe lo haya solamente algun cupo di trabou temporal. Pero bon, esey ta locual e politiconan tradicional kier: laga e pueblo adicto na refinamento y asina lubida kende a hinca pueblo den e situacion penoso di pedido di limosna aki, den ‘e first place’.

Algun observacionnan cu mester un splicacion publico antes cu firma cualkier contract:

1. Riba 25 April 2010, e minister di Economia y Energia a bisa ‘Pa desarma un refineria e lo costa entre 300 pa 400 miyon dollar. Aruba no tin placa pa desarma un refineria’. Mientrastanto nos tur sa cu na 2016 e situacion financiero di Aruba solamente a empeora. Dus, di unda e placa pa cumpra e refineria ta sali?
   
   
2. Ki tipo di ‘tax holidays and agreements’ lo wordo regala atrobe pa un posibel reapertura di e refineria?
   
   
3. E siman aki paisnan (Rusia y Saudi Arabia) cu tin hopi mas petroleo y gas cu Venezuela, a anuncia cu nan tin cu tuma medidanan di impuesto pa compensa e perdida di entrada pa via e prijs abou di petroleo (awe, US$ 29 (WTI)). Con un pais manera Venezuela cu ta depende pa 80% di e entradanan di petroleo pa cubri su gastonan domestico y cu mester di un prijs di petroleo di US$ 125 (Bloomberg Business), por opera un refineria den exterior cu un prijs di petroleo asina abou? Pa comparacion Rusia y Saudi Arabia mester di un prijs di petroleo di US$ 106 (Business Insider);
   
   
4. IMF a bisa: ‘The International Monetary Fund warned last month that most countries in the Middle East -- including Saudi Arabia, Oman and Bahrain --- will run out of cash within five years if oil prices don't rise above roughly $50 per barrel’. Si paisnan asina por termina sin placa pa via di prijs di petroleo mas abou cu locual nan mester djis pa haci e negoshi rendabel, con a para cu Venezuela cu tin e inflacion mas halto di e region y un scarsedad di divisa?
   
   
5. Cua ‘business-model’ e refineria aki ta bay uza pa haci e operacion economicamente factibel y rendabel?
   
   
6. E refineria ISLA na Corsou, cu ta un refineria completo y cu ta wordo opera pa e mesun doño di CITGO (PDVSA), ta wordo menasa cu algun boet miyonario di veredictonan di corte cu e ambientalistanan a gana pa e polucion ambiental. Ta p’esey diripiente PDVSA a bolbe haya interes den e refineria di Aruba?
   
   
7. Gobierno sa di e veredictonan aki? Gobierno a pone algun clausula ambiental den e contract cu CITGO/PDVSA tocante e polucion? Of locual PDVSA no por haci mas na Corsou si e por haci na Aruba?
   
   
8. Den caso cu si PDVSA yega un areglo cu e gobierno di Corsou tocante e boetnan ambiental y asina e por sigui cu su operacion na Corsou. Con realistico of duradero un posibel reapertura por ta?
   
   
9. Con gobierno por garantisa e pueblo un operacion di 20 aña di CITGO/PDVSA, mientras e mundo petrolero actual ta asina insigur? Of ta pasobra e politiconan tradicional solamente ta wak con nan por gana e proximo eleccion cu un posibel reapertura di e refineria di algun aña?
   
   
10. E refineria lo wordo uza pa solamente pa produci ‘nafta’ pa ‘blend’?
    
    
11. Kico lo pasa cu e operacion di e refineria ora PDVSA termina cu su mesun programa di  ‘upgrade and expansion’ di su mesun refinerianan na Venezuela cu lo produci suficiente ‘nafta’ pa ‘blend’?
    
    
12. Gobierno a anuncia cu e refineria lo wordo opera ‘Green’. Cu algun di e ‘furnaces y boilernan’ den e refineria ta ‘dual firing’, no kiermen cu e refineria lo opera ‘Green’. Pregunta ta, di unda e gas aki lo bin y ken lo bay paga pa esaki?
    
    
13. Cuanto placa e lo costa pa cumpra e facilidadnan di Valero y si esaki ta encera tambe e parti di ‘transhipment’?
    
    
14. Cuanto cupo di trabou lo wordo genera pa esunnan local y ki garantia gobierno tin cu esaki lo wordo ehecuta manera palabra den practica?
    
    

Pues nos di partido ABO lo kier pa gobierno mustra transparencia y duna splicacion riba e observacionnan aki, prome cu cualkier contract wordo firma. Pidiendo e informacion no tin nada di haci cu ta contra un reapertura. Esaki tin mas di haci cu transparencia, bon gobernacion y un politica nobo y moderno. Pues gobierno, contesta sincero enbes di bagatelisa y ridiculisa cualkier observacion critico cu ta na bienestar di e pueblo y e futuro generacionnan. Spera tambe cu nos parlamentarionan por sali na defensa di e bienestar general porfin, enbes di esun di nan partido!


(www.aboaruba.org, This email address is being protected from spambots. You need JavaScript enabled to view it.)

Expresionnan haci den e articulo aki no necesariamente ta refleha opinion di ArenaPoliti.co