Gobierno ta cumpli y surpasa expectativa pa reduccion di deficit nacional 

ORANJESTAD – Minister President Mike Eman a cuminsa su turno na palabra, den di dos tanda di tratamento di Presupuesto 2016 cu un mensahe bon cla: Raad van Advies den su rapport ta premira cu Gobierno lo alcansa y surpasa e meta pa reduccion di deficit. Esey, riba su mes, ta motibo suficiente pa aproba Presupuesto Nacional 2016 pa aclamacion popular den e organo mas halto di nos pais. E ta nifica cu Gabinete Mike Eman ta cumpliendo cu e meta fiha na 2009 y ratifica pa pueblo na 2013 cu saca Aruba di e crisis economico y ta tuma e pasonan pa prosperidad financiero cu un surplus riba su presupuesto.

Premier Eman  a recorda con su Gobierno a fiha cu pa aña 2015 e deficit lo mester ta 3.7% y na aña 2016 mester ta 2% y na 2017, 0.5% y asina sigui pa na aña 2018 tin un surplus riba e Presupuesto Nacional di 0.5%. Prome Minister ta compronde cu e pregunta mas relevante, los di tur discusion, ta con sigur Gobierno, Parlamento y comunidad por ta cu ta bay cumpli cu e norma cu a pone pa nos mes. Ta rasonabel pasobra dor cu presupuesto ta un calculacion/pronostico cu Gobierno ta haci a base di evaluacion di gasto cu ta premira pa e aña y kico ta e entrada cu ta calcula ta yega na e cifra di deficit.

“E ta un pregunta hustifica,” Prome Minister a bisa den sala di Parlamento y su tras “Nos tin nos mes evaluacion y evaluacion di otro instancia.” Y di eynan ta bin e hecho cu fraccion di oposicion ta keto pa loke ta trata e conseho di Raad van Advies. E rapport na pagina 14 ta indica cu ta calcula cu e cifra di deficit pa 2016 lo ta 1.7% di e PDB. “A papia hopi aki den, lansa acusacion y insulto, pero esaki ta e esencia di loke nos ta debatiendo aki,” Minister President a bisa.

El a splica cu ta e mesun hendenan, mesun secretaris y consehero cu na 2014 a bisa pa tene cuidou y awe, e mesun hendenan aki ta bisa cu e manera con ta administrando e presupuesto, con nan ta hopi convenci cu ta bay yega na e norma, of te hasta pasa bou di e norma di 2%. “Bo por tin otro opinion politico, pero ora cu Raad van Advies bisa cu Gobierno tabatin e capacidad di reduci e deficit di 9.7% pa 3.7% pa bou di 2%; pa aclamacion nos mester aproba e presupuesto aki!” tabata e palabranan di lider di Gabinete Mike Eman I y II.

Un biaha mas a keda demostra cu hopi pais a pasa den crisis economico y a pasa den mesun situacion dificil, pero ningun a logra haci e ehercicionan doloroso, complica y dificil cu Gobierno di Aruba na 2009 si tabatin e curashi y determinacion pa haci, pa asina awe nos por ta miho para manera nos ta.

Expresionnan haci den e articulo aki no necesariamente ta refleha opinion di ArenaPoliti.co