E gobierno actual a redobla e debe nacional den apenas algun aña cu proyectonan miyonario y cuestionabel, cu shownan y fabulanan, cu conseheronan costoso y cu cumpramento di voto via un trabou den gobierno of un permiso. Consecuencia di esaki ta cu awendia Aruba ta bancarota, ta na rudia y merced di Hulanda y conoce un pilar economico. Conclusion, e gobierno actual a hinca pueblo den mas miseria y pobresa, pa asina despues e por tira cualkier ‘pinda’ pa e pueblo desespera y asina aparenta como e ‘Gran Salbador’. Esaki ta comparabel cu un persona den desierto cu tin sed. E unico cos cu ta conta pa e persona ta, un tiki awa pa e sobrevivi.

Ta un custumber di gobierno manda un experto prensa, pa duna un splicacion di un proyecto/plan, ora esaki cuminsa bira un batata cayente. E idea tras di esaki ta, segun e pensamento di gobierno, si un experto bis’e anto pueblo lo kere e storia mas lihe cu si gobierno bis’e. Wel ta akinan ta unda gobierno ta bolbe abusa di e inteligencia di pueblo. E unico cu ta conta e ora ey pa gobierno, ta cu e mester di un cabay di campana pa pronkia cu’ne y cu algun comision financiero a wordo paga na algun hende rond di gobierno. A pesar cu tin hopi ehempel di proyecto/plan asina, ainda esaki ta e forma preferi di hiba campana pa e politiconan tradicional, despues di 30 aña di Status Aparte. Y dicon? E contesta ta simpel. Pueblo ta gusta, pueblo ta acepta y pueblo tin miedo di haci pregunta.

Pa algun hende, e reapertura di e refineria ta e salbacion pa sali di e situacion economico dificil di e isla . Of ta esey ta locual algun politico tradicional kier laga nan kere. Den esaki, ningun triki ta ‘off-limits’ pa convence pueblo con bon e ‘CITGO-deal’ ta. E mesun triki a wordo uza na 2009 cu e ‘PEMEX-deal’, na 2013 cu e ‘PETROBRAS-deal’ (boso ta corda: ‘solamente e inkt tin cu seca’), ‘PETROCHINA-deal’ y hasta e ‘PETROTRINIDAD-deal’. Wel siman pasa, gobierno a dicidi cu el’a bira tempo pa envolvi un experto petrolero local, den e show di convence pueblo cu e ‘CITGO-deal’ ta hopi bon. Wel ta akinan, ta caminda un tiki di mas exageracion a pone tur cos den duda. E experto a declara: ‘CITGO/PDVSA kier e refineria na Aruba pa 50 aña’ (Solo, 29 januari 2016).

50 aña? Ni un hipoteca pa cas, bo por haya mas pa 30 aña. Awor un operador petrolero, cu no ni kier a tende di Aruba te cu algun luna pasa, diripiente kier un deal di 50 aña? Esaki ta un otro forma di trata di convence pueblo di e seriedad cu e ‘CITGO-deal’ ta bon? Esaki ta e termino pa paga bek e prestamo cu lo wordo fia for di CITGO/PDVSA pa cumpra e refineria? Nunca mi a tende of mira di un deal di 50 aña den mi bida. Cualkier tipo di deal, ta wordo cera pa un periodo di 5 of 10 aña, cu e posibilidad pa extende e deal. Pero cada biaha prome cu extende e deal, esaki mester wordo negocia atrobe. Pues e gobierno actual kier mara pueblo y su futuro generacionnan na un deal di 50 aña, djis pa haya un cabay di campana cu lo produci kisas 300 cupo di trabou. Wel, wel. Esaki ta un otro muestra cu e gobierno actual no sa kico e ta negocia of e sa precies kico e ta negocia, pero cu e solo meta pa beneficia un grupito, a costo di e pueblo.

P’esey awor mas cu nunca partido ABO ta bolbe exigi publicamente, pa gobierno mustra pueblo e supuesto ‘CITGO-deal’, prome cu firma cualkier deal pa mara pueblo atrobe na un deal miyonario y controversial, cu no ta na bienestar di e pueblo. Mustra transparencia, seriedad y honestidad si no tin nada pa sconde!

(www.aboaruba.org, This email address is being protected from spambots. You need JavaScript enabled to view it.)

Expresionnan haci den e articulo aki no necesariamente ta refleha opinion di ArenaPoliti.co