"Fraccion di AVP no a sigui e wega di mocionnan y expresionnan populista di MEP durante di e reunionnan di tratamento di presupuesto 2016. Fraccion di AVP a scohe pa desaroyo continuo y stabilidad di nos pais awor y den futuro. AVP a scohe pa sigui cu e proceso pa yega na presupuestonan balansa, pa sigura servicionan essencial di gobierno pa pueblo, pa sigura stabilidad di e fondonan di pensioen y di seguro medico. Pasobra esakinan ta sigura henter pueblo cu nan entrada, nan pensioen, nan cuido medico y desaroyo di nos pais ta sigui stabiel y no cay bek den e abismo di decadencia y inseguridad cu MEP a bay laga nos pais aden." Lider di fraccion di AVP den Parlamento a bisa esey un dia despues di aprobacion di e presupuesto 2016.

POPULISMO DESCABEYA
E populismo descabeya di e fraccion di MEP a yega un punto irresponsabel segun sr. Herde'. Por a wak esey den un cantidad di expresion y den hopi di e mocionnan cu nan a presenta durante di e reunion. Rene Herde': "Ta facil pa propone cosnan cu ta zona masha atractivo y hasta deseabel, pero si bo no bisa con ta paga pa nan, bo ta gaña pueblo. Bo ta actua irresponsabel." Rene Herde' a menciona algun ehempel.

BAHA EDAD DI PENSIOEN
Rene Herde:"E lider di MEP mes a propone algun aña pasa pa hisa e edad di pensioen na 65 aña den 6 pa 7 aña. Kier men den menos tempo cu gobierno a propone. Awor su miembro di fraccion ta priminti pa baha e edad di pensioen na 62 aña. E mes un partido cu a casi manda e fondo di pensioen bancarota y laga mas cu 20 mil pensionado y nan famia sin entrada, awor ta hunga cu sentimiento di pueblo y propone esaki, pero sin bisa con ta paga p'e. Mare por a haci esey. Niun hende a hisa e edad di pensioen cu gana. Pero pa salba e fondonan y sigura cu tur pensionado por sigui cobra nan pensioen awor y den futuro, mester a cambia e structura di e fondonan. A haci esaki gradualmente y sin mishi cu e pensioen di tur luna di e pensionadonan. Dios gracia nos a logra haci e fondonan stabiel atrobe. Lansa ideanan irresponsabel, cu nan no por ehecuta y cu tin como unico meta pa hunga cu sentimento di pueblo, ta e forma populista mas mahos y falso cu por tin. E ta gaña pueblo den su cara, sabiendo cu loke ta bisa no por wordo realisa. Nos di AVP no ta sigui e tipo di actuacion irresponsabel aki. Nunca! Loke nos bisa cu nos ta bay haci ta basa riba estudio y plannan serio traha cu conseho di expertonan. Y si nos no logra nos metanan di un forma, nos ta busca otro forma. Pero semper cu e mes un sentido di responsabilidad pa nos pais y pueblo, pa awor y den futuro. Ora nos stabilisa finansa publico nos ta haci'e sin afecta economia of forsa di compra. No den forma di medida estilo di MEP. Ora nos a bisa cu nos ta mehora forsa di compra nos a haci'e pa tur hende cu entrada abou sinti'e. Nos a calcul'e y haci'e den forma responsabel."
Asina Rene a sigui mustra riba mas promesa cu ta pio cu esnan cu MEP ta haci den campaña. Aparentemente MEP no a siña di e lema di nan ex-lider: "Campaña ta un cos. Goberna ta otro."

Expresionnan haci den e articulo aki no necesariamente ta refleha opinion di ArenaPoliti.co