Durante e tratamento di Presupuesto 2016 pa nos Pais, Fraccion di MEP a presenta un mocion di desconfiansa contra Minister Sevinger pa asina desaproba tur e fechorianan cu e mandatario aki a bin ta haci cu otorgacion di tereno, cambio di destino di tereno y cambio di balor di tereno publico na nos Pais. E mocion di desconfiansa contra Minister Sevinger ta na su lugar y esaki a keda bon argumenta cu tur prueba di carta y tambe veredicto di juez pa mustra e seriedad di locual ta e mocion aki ta representa. Full opocicion y e propio Presidente di Parlamento a bay di acuerdo pa kita e confiansa den Minister Sevinger pero lamentablemente e Fraccion di AVP a keda sostene e fechorianan di Minister Sevinger su abusonan contra e Pueblo aki.

Otorga tereno y entrada na hende cuestionabel
Den e mocion nos a trece e documentacion dilanti pa mustra con Minister Sevinger den un carta entrega personalmente na dje, ta duna Roberto Rincon, e comerciante den man di Husticia Mericano sospecha di labamento di placa y soborno, un tereno di mas di 3000 m2 den solamente 5 dia di tempo. Banda di esaki nos a mustra con Minister Sevinger a bay asina lew di manda carta pa IASA pa asina laga e sospechoso Roberto Rincon drenta Aruba sin problema. Segun e mandatario e no tabata sa nada y a google Rincon pero un hende cu conocemento di bon gobernacion sa cu google no ta e herment necesario pa screen inversionista pesey tin por ehempel ‘world check.’ Ta bisto cu Minister Sevinger ta deal cu hende cuestionabel y ta malusa su poder pa asina nan por haci deshaci na nos Pais.

Cambia prijs di tereno den Caya Betico Croes
Minister Sevinger riba su mes y sin argumentacion of conseho di experto bay over pa cambia prijs di tereno den Caya Betico Croes pa asina por previlegia hendenan cu ta serca di partido AVP. E tereno tin un balor di 1500 florin pa m2, pero Minister Sevinger a djies cambia e prijs na man pa 90 florin pa m2 bisando cu ta un proyecto di hotel pa centro di cuidad. Di e manera aki Minister Sevinger ta actua contra tur regla di bon gobernacion perhudicando entre otro e comerciantenan den e area cu si tin cu paga prijs mas halto pa haci uso di nan tereno.

Trapa riba estado di derecho
Mas tristo ta e veredictonan di Huez den cual ta bira bisto con Minister Sevinger ta trapa riba e estado di derecho di nos Pais. Asina nos a mustra con den e caso di Ocean Z, e caso di Porco y den e caso di sr Paul Gibbs, Huez a dicta cu Minister Sevinger ta frustra e caminda pa e cuidadano busca su derecho, ta rasca na e raiz di nos estado di derecho y ta zaag na e pia di e stul di nos estado di derecho. Pa e pifianan aki so caba e mocion di desconfiansa contra Minister Sevinger ta na su lugar.


23 feburari 2016

Expresionnan haci den e articulo aki no necesariamente ta refleha opinion di ArenaPoliti.co