Aña pasa paisnan rond mundo a adopta un cantidad di metanan pa caba cu pobresa, sigura prosperidad y proteha e planeta pa un y tur. Esaki ta forma parti di e agenda pa cu Desaroyo Sostenibel stipula pa Nacionnan Uni conhuntamente cu e paisnan. Cada meta a stipula cu mester wordo logra den e proximo 15 añanan, pues pa mas tarda aña 2030. Pa logra e metanan aki, tur hende, tanto gobierno, sector priva, henter  e sociedad, nos cada un como hende mester duna nos aporte.

Ta urgi cada pais pa cuminsa haci esfuersonan pa asina logra e 17 metanan stipula. E 17 metanan ta forma parti di un vision comun di humanidad cu paisnan a comparti cu otro den un forma di un contrato social entre lidernan di mundo. Nacionnan Uni ta spera cu e 17 metanan aki ta forma parti di e “To Do List” di cada pais y di su hendenan, na unda no ta desea pa niun hende ni niun pais wordo laga atras. E scope amplio di e topiconan di e metanan por wordo reparti den 3 diferente dimension cu ta: Desaroyo Social Sostenibel, Economico y di Medio Ambiente.

Por observa den e lista cu caba cu pobresa den tur sentido ta e prome meta mundial stipula pa paisnan di mundo conhuntamente cu Nacionnan Uni. Caba cu hamber na mundo pero alabes ofrece siguridad di alimentacion y tambe mehora nutricion pa e hende ta e di dos meta. E di tres meta ta sigura cu por tin un bon sistema di salubridad y promove bienestar general den tur grupo di edad. Sigura y promove calidad di educacion husto y e oportunidad di adkiri un eduacion pa un y tur ta e di 4 meta riba e lista. Meta number 5 ta pa logra igualdad entre generonan y “empower” e hende muher, sigur den e forsa laboral.

Tumando nota di e 17 metanan por wak cu energia sostenibel ta te na di 7 lugar na unda ta indica tambe pa Nacionnan Uni cu e energia aki mester ta pagabel y confiabel pa e pueblo. Observando cuanto placa y tempo e gobierno actual di Eman ta hincando den proyectonan PPP y Green, lo ta importante pa nan tuma nota cu esakinan no ta cuadra cu e secuencia di prioridad determina pa paisnan conhunto na mundo. Ta straño cu Sr. Eman ta bishita diferente pais, conferencia of congreso incluyendo Nacionnan Uni y nunca e no a menciona esaki na Aruba! Paso manera United Nations (UN) ta avisa, pa comberti e vision aki den realidad ta na prome lugar e responsabilidad di cada pais! Principalmente paso UN lo bay monitor y corigi uzando un sistema di indicadornan mundial.

Pa mas informacion: https://sustainabledevelopment.un.org/?menu=1300.

Expresionnan haci den e articulo aki no necesariamente ta refleha opinion di ArenaPoliti.co