Nos unico pilar economico ta turismo y nos mester percura pa cuida esaki mas cu nos por. Nos tin e deber y obligacion pa haci tur loke ta na nos alcanse pa nos tin un pais cu ta ofrece lo mehor na turistanan pa nan por keda bin nos pais. Na monento cu bo tin un minister cu no tin vision y mas bien ta traha ad-hoc nos turismo ta corre risico pa bai den crisis. Netamente esaki ta loke ta pasando actualmente riba nos pais. No solamente grado di occupacion na hotelnan ta cayendo pa 9 luna consecutivo, sino REV PAR tambe ta cayendo pa 9 luna sigui. Banda di esaki e market share di nos promer Mercado turistico cual ta e Mercado mericano tambe a disminui durante ultimo 5 anjanan. Si na anja 2010 e market share di turistanan mericano tawata 65.1% anja pasa na anja 2015 esaki a baha te na 50% cual ta un caida di 15%. Esaki ta un preocupacion grandi mirando cu nos ta birando mas y mas dependiente riba e mercado Venezolano cual crecemento por wordo considera como uno ficticio. Un minister di turismo cu ta traha na biniestar di e pais aki y kier percura pa tin un turismo solido y duradero lo mester a traha un Master Plan no awor sino 6 anja pasa caba. Na momento cu bo turismo ta wordo maneha pa decisionan ad-hoc manera ta pasando na e momentonan aki bo ta den problema serio.
Nos turismo mester un masterplan cu mester bira un vision pa e proximo 10-15 anjanan. Nos mester por proyecta den e master plan aki cu cuanto stayovers nos kier y por crece como pais. Nos mester por proyecta of en todo caso pone como meta cu cuanto turista crusero nos kier of por crece. Mester inclui den e plan aki tambe e ley di ordenanza territorial. Mester stipula cuanto camber di hotel lo por bin aserca pa e proximo 10-15 anjanan.  No solamente mester wak cuanto camber di hotel mester sino tambe ki clase di hotel bo kier atrae. Na e momentonan aki nos mester sea hotelnan di calidad, hotelnan di 5 strea of boutique hotels cu ta hotelnan mas chikito y super luhoso. Nos mester por ordena nos pais na un manera organiza. Actualmente nos pais no tin regla, gobierno mes no ta respeta nos leynan y mas bien ta trapa riba esakinan y mucho menos nan ta respeta maneho. Ta depende ken bo ta ta e trato cu bo ta haya for di gobierno. Nos pais ta desorganiza, no tin un structura y e imagen cu un turista ta haya ta un imagagen di chaos. Nos mester por proyecta ki tipo di restaurantnan nos kier aki 10-15 anja, cuanto supermercado mas nos kier riba e pais aki. Cual ta e zonanan cu bo kier ma desaroyo y undam ester limita desaroyo. Mester haci un investigacion tambe cuanto riba vivienda, scolnan y e fondonan di pensioen y AZV. Tur e ingrdientenan aki mester bin den un masterplan pa nos turismo. Nos mester por atrae mercadonan nobo pa diversifica nos turismo. No manera ta e caso aki caminda pa 6 anja e minister di turismo ta drumi morto na sonjo y e anja aki kier purba diversifica e Mercado turistico.
Nos partido tin un plan y a sinta cu expertonan den e area turistico pa haya nan feedback y tambe nan input con pa mehora nos producto Aruba.

Expresionnan haci den e articulo aki no necesariamente ta refleha opinion di ArenaPoliti.co