Tempo AVP ta den opisicion nan tawata grita cu Aruba NO tin mester di mas hotel. Nan tawata boga pa bin cu un moratorium riba construccion di mas camber di hotel. Varios rapport a wordo traha y presenta. Un di e rapportnan  nan tawata usa ta e rapport di Sam Cole cu tawata yama Carrying Capacity. Propio lider di AVP a bisa enfaticamente cu si e yega den gobierno nan NO lo bin cu mas hotel pasobra e pais no por carga mas. E lo tin peso addicional riba nos scolnan, riba fondonan social, fondo di pensioen, vivienda y infrastructura. Con stranjo cu e por zona awe net e partido cu ta conra binimento di mas hotel a presenta mas cu 7 proyecto hotelero caba. Varios di e hotelnan aki ta den zona berde tambe.

AVP ta un partido di traicion y mentira pasobra tur promesa cu nan a haci a keda sin cumpli cune y haci net contrario awe nan ta den gobierno. Te hasta e proyecto di Ritz Carlton, e unico hotel di 5 strea aki naAruba nan kier a para y a protesta contra esaki.

Awe cu nan ta den gobierno e rapport di Sam Cole a wordo poni den lachi, awe nan no ta papia mas di moratorium sino awe ta papia con nan ta yena nan saco y con amigonan ta bende patrimonio di pueblo.

Otmar Oduber kiermen su vision ta pa atrae turistnan di calidad. Nos kier sa con bo ta eleva bo calidad di turistnan si ta bin cu un desaroyo di un airport hotel riba un pais asina chikito manera Aruba specialmente pa comerciantenan cu ta bin nos pais. Aruba tin varios hotel cu tey caba pa sirbi e doelgroep aki. Tin Renaissance Hotel den playa, no mucho lew di airport tin Talk of the Town cu hopi vez ta wordo usa pa comerciantenan cu ta bin Aruba. Awor Otmar Oduber mester splica di unda e demanda a sali pa bin cu un aiport hotel cu ta contra cu mesun vision y principio. Na momento un hende no tin caracter y no tin principio bo ta haya e tipo di desaroyonan aki. E airport hotel aki ta uno hopi cuestionabel pasobra te dia di awe ningun hende a wak un businessplan, ningun hende a wak un rendering, parlamento di Aruba no a haya ningun presentacion y mas bien di un dia pa otro ta anuncia un proyecto di airport hotel. Den un pais caminda bo kier eleva bo calidad di turismo simplemente un aiport hotel no ta fit den e vision aki.

No solamente tin binimento di un airport hotel sino e mesun Otmar Oduber aki a bisa cu lo bin desaroyo di hotelnan cu gobierno a anuncia manera Marriot Residence Inn, Courtyard Marriot y Embassy Suites. Particular den e caso aki ta cu Otmar Oduber ta na fabor di un aiport hotel pero ta contra e desaroyo di e otro hotelnan. Ta bon pa e mes splica dikon un si y e otronan no. Nos di MEP NO ta kere den ningun di e desaroyonan anuncia pasobra ningun lo yuda na atrae turistanan di calidad. Preguntanan cu Otmar Oduber mester duna contesta na nan: Kende e grupo di inversionista ta? Nan ta amigo di e minister Otmar Oduber? Nan ta un grupo serio? Ki balor agrega e hotel aki tin pa nos turismo?

Nos ta lamenta con e gobierno aki a haci e deshaci cu patromonio di pueblo a practicamente a duna tur tereno commercial sea na amigonan pa bende of na amigonan desaroyadornan pa bin cu hotelnan di 2 strea of menos.

Expresionnan haci den e articulo aki no necesariamente ta refleha opinion di ArenaPoliti.co