Banco Central ta pidi cautela cu e tema di 'all inclusive'. 

ORANJESTAD -- Parlamentarionan di MEP den ultimo simannan ta reuniendo cu varios instituto  riba desaroyo economico den nos pais. Diamars ultimo lider di MEP sra Evelyn Wever-Croes, y parlamentarionan sra. Xiomara Ruiz-Maduro, sr. Dangui Oduber y sr. Guillfred Besaril a reuni cu ehecutivonan di Banco Central riba diferente topico.

E topico di finansas publico a haya hopi atencion, especialmente desde cu Banco Central a publica un deficit financiero pa 2015, cu tabata double di e cifra cu gobierno a duna CAFT. Banco Central a mustra kiko por ta e diferencianan, pero a indica cu ainda tin un investigacion andando pa haya sa mas sigur kiko e diferencianan ta. Hecho ta si cu e diferencia mas grandi ta sinta den e decisionnan cu gobierno na fin di anja cu mester a wordo hasi liher liher. Locual ta mas lamentable ta cu minister Bermudez, en bes di duna claridad, a scohe pa desacredita Banco Central.

Un otro tema cu a wordo discuti tabata e tema di 'all inclusive'. Mirando e forma con minister Otmar Oduber a cuminsa un guera den prensa contra e hotelnan, fraccion di MEP a cuminsa e caminda di dialogo y ta busca forma pa yega na un solucion. Un di e puntonan crucial y mas problematico den e ley di 'all inclusive' manera cu minister Otmar Oduber a manda Parlamento, ta e hecho cu no tin un investigacion hasi na Aruba riba 'all inclusive'. "Nos ta satisfecho di tende cu Banco Central ta trahando riba esey, y nos ta kere cu e investigacion ey lo yuda sigur den un solucion. Nos tur ta di acuerdo cu nos no kier mas all inclusive na Aruba, pero nos tur ta di acuerdo tambe cu e ley manera cu e ta awor, no ta e forma con pa hasie. Nos reunion cu Banco Central a bai hopi bon y nos ta gradisi ehecutivonan di Banco pa e informacion brinda", segun lider di MEP. 

Expresionnan haci den e articulo aki no necesariamente ta refleha opinion di ArenaPoliti.co