Di un fuente fidedigno, UPP a bin comprende cu a surgi problema grandi den e top di hospital, e minister y su muchanan manda Gino Goeloe y Edwin Tromp pa loke ta toca e proyecto di renobacion/expansion di nos hosptaal.
No ta un secreto cu desde un comienso UPP a bin ta denuncia e forma con a tuma e decision pa otorga e proyecto biyonario aki na un compania cu un track record cuestionabel, y cu envolvimento directo di e compania di architecto corupto Bermello.
Tambe UPP a denuncia e rol di SOGA/AIB, principalmente e forma di proceder di sr. Frensel Giel y John Hodgson, entorno e proyecto aki. 

E inicio di combersacionnan entorno e estado di e edificio di HOH ta data for di tempo cu mi persona tabata encarga cu salubridad.
Sr. Frensel Giel (AIB) e tempo ey a traha un rapport na unda a desconseha construccion di e hospital na e sitio actual y a sugerí construccion di un hospital completamente nobo mas den centro di nos Isla.
Gobierno a cambia na 2009, y igualmente e conseho di sr. Giel tambe, pasobra diripiente SI su persona no a mira mas inconveniencia pa construccion y renobacion di hospital na e sitio actual.  
E diferencia sinembargo tabata e prijs.
Mientras cu sr. Giel a calcula esaki na alrededor di 217 miyon florin pa un hospital completamente nobo y cu equiponan nobo y tur esaki incluyendo PAAZ, awor aki e la bira casi un biyon florin, y ainda falta, y esaki SIN cu tur equipo ta nobo, y sin cu PAAZ tabata forma parti di e renovacion.
Ta kiko a pasa? Aki e proverbio: "Money talks, ........walks"??? ta conta??

E siguiente combersacion pa construccion/renovacion di e edificio actual a cuminsa casi 5 aña pasa y construccion a start mas di un aña pasa.
E proyecto - contrario na loke ta tumando lugar na Corsou na unda sí ta cuestiona e forma con e construccion ta tumando lugar y ta exigi transparencia - aki na Aruba e gobierno no ta perde ningun oportunidad pa gaba con e proyecto ta progresa, pero no ta mustra ningun clase di transparencia pa loke ta toca e problemanan manera e sala di operacion y otro problemanan cu nos a bin ta señala for di basta tempo caba, na unda Bermello ta esun cu ta haci y ta deshaci, y ningun hende ta pare. E lo tin tur hende cumpra pa keda keto?

Awor aki nos a wordo informa cu tin problema serio entre e minister, su dos muchanan manda den Raad van Toezicht y e “bouwcommissie” di hospital cu ta cay bou di encargo di e director financiero di hospital. Nos no  a ricibi ainda e detayes di e conflicto, pero loke ta remarcabel, ta cu despues di tanto aña ta surgi un problema entre e stakeholders importante di e proyecto aki.
Of ta nan ta e uniconan cu ta trata di cuestiona e forma con Bermello ta funcionando?
Y aki en bez cu minister mira cu ta e bienestar di Aruba e bouwcommissie ta purba di sirbi, e minister aki ta contra nan y ta exigi di nan pa no mete mas den e proyecto aki.
Dicon? Ta mas "meerwerk" mester bin??

UPP ta urgi tur esnan involvi pa exigi claridad y transparencia, pasobra ya caba Aruba a wordo perhudica pa e suma cu e hospital aki lo bay costa, sin cu a tene cuenta cu e “extra’s” cu posiblemente e architecto lo kier bay impone riba gobierno.
UPP no tin confianza ni den e minister, ni den e ehecutivonan di AIB, ni den SOGA, y sigur no den e  Infrateam, ni tampoco den e dos muchanan manda di e minister.
Nan lo mester bay carga e consecuencia di nan envolvimento den e proyecto aki cu tin tur ingredientenan pa ser considera como un proyecto corupto, mescos cu e proyecto di Racetrack, na unda tin varios politico activo tabata involvi cu te hasta a traiciona nos Pais testiguando na fabor di Bermello, djis pa faborece Bermello.
Ta p’esey partidonan politico ta kedando keto asina? Nan tambe debe Bermello??

Ta p’esey UPP ta exigi un investigacion profundo riba e proyecto aki.
Unda sindicatonan ta keda? Ta placa di boso miembronan ta coriendo peliger.
Na varios ocasion UPP a pidi pa e sindicatonan reacciona, pero envano. Ainda no ta laat. 

Den nomber di Union Patriotico Progresista – U.P.P.
Candelario A. S. D. – Booshi – Wever
Brazil, juni 1, 2016

Expresionnan haci den e articulo aki no necesariamente ta refleha opinion di ArenaPoliti.co