ORANJESTAD – Momentonan despues di a participa na e ceremonia di firma e acuerdo cu Citgo Petroleum Corporation hunto cu Minister President Mike Eman firma na Caracas, Minister di di Economia, Comunicacion, Energia y Medio ambiente ing Mike de Meza a expresa di sinti su mes sumamente orguyoso y hopi contento. “Algo sumamente bunita pa mira,” el a bisa cu hopi emocion. “Pa prome biaha den historia di 100 aña di refineria na Aruba, nos ta bira doño di e facilidad na San Nicolas.”

E acuerdo cu Citgo ta un modelo diferente, tanto den e funcion di e facilidad su mes, como tambe den e parti cu pais Aruba tin den su operacion. Ta duna Minister ing. de Meza un orguyo particular e hecho cu ta un delegacion di nos propio Arubianonan cu a logra tur esaki.

Aruba pa prome biaha doño di e refineria. Citgo ta bay lease e facilidadnan na San Nicolas y e acuerdo firma ta inclui cu e compania Mericano, subsidiario di PDVSA ta bay haci un inversion di entre 750 miyon dollar y 1000 miyon dollar den e rehabilitacion, pero asina mes, e refineria ta keda di Aruba.

Manera ta conoci, e no lo ta un refineria mas specificamente, pero mas bien un ‘upgrader’ caminda ta procesa crudo Venezolano y hacie den un Crudo sintetico di calidad cu riba mercado internacional tin un balor hopi mas halto cu e crudo original. Segun Minister de Meza, esaki ta un substancia cu tin gran demanda p’e den e mercado internacional.

Fuera cu ta nos localnan a negocia tur esaki, nos hendenan ta bay opera e refineria bou direccion di Citgo. E maneho di e propiedad y e mercadeo local di productonan ta bay cay bou di dos compania estatal di Aruba y maneha pa Arubianonan. Entre otro lo ta encarga cu e logistica di diesel, gasolin, jet fuel y otronan mescos cu, por ehempel, CurOil na Corsou.

“Dus aki na Aruba eigenlijk a tuma over full e industria,” asina Minister Ing. de Meza a comenta. Den su aliansa cu Citgo ta haya acceso di crudo di Venezuela for di e ‘Orinoco Belt.’ “Bo ta garantisa un suministro di crudo y bo ta garantisa un operacion sostenibel y economicamente viabel. E ta un concepto completamente diferente,” e mandatario a splica.

Despues di a firma acuerdonan cu CITGO y MOU's cu PDVSA diabierna ultimo, awo ta sigui pa finalisa e negociacionnan entre Gobierno di Aruba y Valero cu ta den etapa avansa. Un bes cu keda cla, ta manda tur documento pa Parlamento y asina, pa mas tarda 1 di augustus, tur cos por ta cla y e periodo di rehabilitacion por inicia.

Expresionnan haci den e articulo aki no necesariamente ta refleha opinion di ArenaPoliti.co