Segun Minister di Petroleo y Minas di Venezuela, Eulogio del Pino 
Gas ta disminui tremendamente emision di CO2 

ORANJESTAD / CARACAS - Diabierna ultimo tabata un dia historico pa Aruba. Citgo Petroleum Corporation a firma hunto cu Aruba un acuerdo pa lease y opera e refineria situa na San Nicolas. Un di e actornan importante den henter esaki tabata doño di e compania Americano, Citgo Petroleum Corporation, cu ta Petroleos de Venezuela (PdVSA). Presidente di PdVSA y alabes minister di Petróleo y Minería di Venezuela, sr. Eulogio del Pino tabata sumamente contento despues cu e acuerdo cu a keda concretisa oficialmente na Caracas.

Den su discurso, sr. del Pino, a splica cu e faha petrolero di Orinoco ta subiendo su produccion mensualmente na un ritmo basta acelera. E refineria na Aruba, cu tin algun aña sin opera, tin e caracteristicanan tecnico cu mester pa loke ta produci na e faha di Orinico. "E ta bay permiti nos, banda di tur e otro instalacionnan cu nos tin, pa transporta via barco pa e refineria na Aruba cu ta 6 pa 8 ora di viahe maritimo," sr. del Pino a splica. "Aya e crudo ta wordo procesa, ta debolbe e Nafta pa por sigui e proceso di produccion. Despues cu mehora e crudo, ta transporta esaki na mercadonan cu ta bay tin demanda pe via di Citgo."

E minister encarga cu asuntonan petrolero ta sigui splica cu for di punto di bista economico, e ta significa un reduccion extraordinario di costo di e operacionnan di e faha di Orinoco. Tambe e ta significa un avansa logistico extraordinario pa Venezuela. Pa Venezuela por construi un planta similar na esun di Aruba lo tuma por lo menos 4 aña djis pa contrui y Aruba su planta cu un inversion mucho menos, por ta den operacion dentro di 2 aña.

Elaborando riba e tema den su discurso, del Pino a splica cu, mirando e desaroyo cu Venezuela a logra den su pontencial di gas natural, combina cu e specificacionnan tecnico di Aruba su refineria, ta bay ta un cambio extraordinario pa e isla uzando gas como fuente energetico pa e refineria. "Esaki un banda ta nifica, desde e punto di bista ambiental un cambio extraordinario, ya cu e ta bay disminui e emisionnan di CO2 cu tabata wordo emiti tempo cu el a wordo opera pa otro transnacionalnan."

Tambe e titular di asuntonan petrolero na Venezuela a mustra riba e hecho cu tur esaki ta bay ta un reduccion di costo tremendamente grandi. E ta splica cu ora opera cu gas tin menos necesidad pa mantencion y tambe e costonan en general ta baha.

Pa e gas natural por yega Aruba, del Pino ta splica cu, nan ta bay construi un sistema di pipanan pa gas natural wordo transporta for di peninsula di Paraguana pa Aruba, un total di 15 kilometer. Del Pino ta calcula cu ta bay por transporta mas o menos 150 miyon pia cubico for di un di e camponan di gas di mas grandi cu a cuminsa opera aña pasa, campo di Cardon. E Minister Venezolano a splica cu tin tuberianan similar caba pa Colombia y ta trahando riba un otro cu ta bay transporta gas pa Trinidad y Tobago. "Suministra Aruba cu gas ta significa un reduccion di costo y impacto ambiental extraordinario."

Pa Venezuela e operacion di e refineria di Aruba dor di Citgo ta strategicamente importante. Nan mester di eleva e cantidad di crudo cu nan ta exporta. E crudo di Venezuela, di Orinoco, ta un crudo basta pisa cu no ta beneficioso economicamente pa bende riba mercado internacional sin wordo procesa prome. Aruba su refineria ta bay ta procesa potencialmente mas di 200 mil bari pa dia di e crudo pisa, produciendo asina crudo sintetico cu tin un balor hopi mas halto den mercado internacional.

Refineria di Aruba ta habri prome di augustus 2016 y tur e acuerdonan ta bay wordo prepara pa haya conseho prome for Raad van Advies (RvA) y djey ta bay Parlamento cu, segun informacion, ta bay trata e topico den luna di juli.

Expresionnan haci den e articulo aki no necesariamente ta refleha opinion di ArenaPoliti.co