BENNY SIEVINGER A VIOLA TUR REGLA DI INTEGRIDAD. 

STA. CRUZ - Aruba ta e unico pais den Reino cu ainda no tin leynan di integridad. Tur demas pais tin e leynan ey. Ta pesey na Aruba tur cos ta posibel. Esnan cu a hinca miyones di dollar den campanja miyonario di AVP ta haya yen di fabornan paga awor. Esnan cu a campanja pa AVP ta hayando cantidad di "regalo". Y autoridad cu ta wak tur esaki pasa, ta bira cara otro banda y no ta actua. 

Nunca antes un gobierno a pasa den asina tanto escandalo manera gabinete Mike Eman. Strawberry gate, Arubus gate, Hacking y hedging gate, Rincon gate, Kiko Gomez gate etc etc etc. Ultimo lunanan no ta pasa un siman cu escandalonan di Benny Sievinger ta mira lus di dia. Minister Sievinger a regala delaster un pida tereno na "su" hendenan y den e proceso a viola e ley di ROP! Esaki ta e casonan mas escandaloso cu pais Aruba a mira den ultimo añanan.  

Aruba mester cu urgencia un ley di financiamento di partidonan politico pa asina por screen di unda AVP ta haya su fondonan miyonario di campanja. 
Aruba mester cu urgencia un ley di screening den cual seguridad nacional ta haya un papel mas prominente. Pasobra si Aruba tabata conose un ley di screening drechi, lo gabinete Mike Eman ta consisti di hopi otro hende. 
Aruba mester cu urgencia un "klokkenluidersregeling" pa duna proteccion na esnan cu ta denuncia e corupcion grandi den gobierno di Mike Eman y un "Ombudsman", defensor di pueblo, pa pueblo por denuncia e corupcion, pasobra pueblo no tin confiansa mas den Ministerio Publico. 
Y finalmente Aruba mester cu urgencia un Codigo di Conducta pa minister pa evita cu nan si cu nan actonan di corupcion. 

Si Aruba logra pasa e leynan aki, nos pueblo por tin e speransa di tin un gobierno integro, y e dianan di gabinete Mike Eman hunto cu tur nan escandalonan y corupcion, ta pasa pa pasado. Si e leynan aki tabata na vigor awor, Benny Sievinger lo tabata e prome cu mester a baha! 

Expresionnan haci den e articulo aki no necesariamente ta refleha opinion di ArenaPoliti.co